Padi për faturat e celularëve – Kompanitë çojnë në gjykatë 26 institucione publike
Faturat e papaguara të telefonëve përplasin prej kohësh institucionet publike me operatorët celularë. Të paktën 26 padi të operatorëve celularë për fatura të papaguara kanë përfunduar në Gjykatën e Lartë gjatë dy viteve fundit, ndërkohë që një pjesë e tyre ende nuk ka marrë zgjidhjen përfundimtare.
Mes 26 institucioneve debitore gjenden Bashki, spitale, komisariate policie, shkolla, por nuk mungojnë as ministritë.
Institucioni me vlerën më të madhe të debisë ndaj një prej operatorë celularë është Drejtoria e Policisë së Shtetit. Më datë 27 korrik, operatori përkatës ka bërë rekurs në Gjykatën e Lartë ndaj Drejtorisë së cilës për vjeljen e vlerës së debisë prej 5.5 milionë lekësh, afërsisht 50 mijë dollarë.
Në të njëjtën situatë është edhe Bashkia e Vaut të Dejës, padia ndaj së cilës për debinë prej 2.9 milionë lekësh, afërsisht 28 mijë dollarësh pret ende përgjigje nga Gjykata e Lartë. Ministria e Shëndetësisë është një prej institucioneve të tjerë me debi të konsiderueshme prej rreth 20 mijë dollarësh.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.