Paditë e vogla jashtë gjykatave – Dhoma kombëtare: Do të largohen nga gjyqësori 70% e çështjeve

Largimi i mosmarrëveshjeve të vogla nga sallat e gjykatave është një prej synimeve themelore të Reformës në Drejtësi. Ligji i ri për ndërmjetësimin ligjor ka për qëllim që këto përplasjet e vogla gjyqësore deri 1 milionë lekë të zgjidhen në zyrat e ndërmjetësuesve dhe jo më në gjykata. Kreu i Dhomës Kombëtare të Ndërmjetësve ligjorë, Drita Avdyli, thotë se me ndryshimet ligjore synohet që të largohen nga sallat e gjykatave 70% e volumit të çështjeve. Kjo, jo vetëm do ulë korrupsionin në gjykata, por edhe mbingarkesën e punës së gjyqtarëve, u shpreh Avdyli.

“70 për qind do të kalojnë në ndërmjetësim, besoj unë. Ne do arrijmë këtë nëpërmjet trajnimit të gjyqtarëve dhe prokurorëve falë dhe ndërhyrjes në kodin dhe procedurën civile. Do bëjmë një fushatë të madhe ndërgjegjësuese në çdo qytet, në çdo fshat, në çdo Njësi Administrative ku ka njerëz, aty ku ka konflikte të përditshme, se kemi tarifa të ulta, kemi një ndërmjetës të licencuar shumë tolerant, shumë efektiv dhe është një zgjidhje alternative. Pra, është një gjë që, si operacioni që shëron plagët që po sjellin konfliktet e përditshme.”

Draftligji i ri për ndërmjetësimin ligjor tashmë është në fazë shqyrtimi në komisionet parlamentare. Intervistën e plotë me zonjën Avdyli do të mund ta ndiqni në orën 19:30 në ekranin e Televizionit SCAN.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.