Paditë ndaj shtetit, 13 mijë përplasje në vit! Kosto e përfaqësimit të shtetit arriti në 175 milionë lekë për këtë vit
Nga Lorenc Rabeta
Ndërsa gjykatat kryesore në vend janë në ngërç të plotë për shkak të shkarkimeve nga vetting-u, situata mund të bëhet edhe më alarmante nga përjashtimet e reja nga ky proces, por veçanërisht nga fluksi shumë i lartë i përplasjeve gjyqësore mes administratës publike nga njëra anë, dhe qytetarëve e bizneseve nga ana tjetër. Këto përplasje akumulohen vit pas viti në gjykatat e apeleve, për të përfunduar në arkivat e Gjykatës së Lartë, e cila aktualisht numëron më shumë se 26 mijë dosje në pritje të shqyrtimit.
“Scan Magazine” ka zbardhur shifrat shqetësuese të gjyqeve ku janë të përfshira institucionet shtetërore gjatë vitit 2017 dhe atij aktual.
Sipas të dhënave zyrtare të Avokaturës së Shtetit, për vitin 2017 ajo ka siguruar në “13,496” gjyqe “Asistencë juridike Institucioneve Shteterore dhe Enteve Publike nëpërmjet këshillimit dhe përfaqësimit në Gjykatat Kombëtare e Ndërkombëtare”. Për katër muajt e parë të vitit 2018, Avokatura e Shtetit ka asistuar në 4,300 përplasje gjyqësore institucionet publike, shifër që, por sipas saj, pritet të arrijë në 12 mijë në fund të vitit.
Kostot, 15 mijë lekë për gjyq
Por, nuk është shqetësues vetëm numri shumë i lartë i gjyqeve ndaj bizneseve e individëve, në të cilat janë ngërthyer vit pas viti institucionet publike. Shqetësim më vete përbëjnë edhe kostot. Nga analizat e vetë Avokaturës së Shtetit, kostot për çdo asistencë në sallat e gjyqeve shkojnë në 11 mijë lekë për vitin 2017, për të arritur në total në 142 milionë lekë. Kosto që rriten më tej për vitin ku jemi. Avokatura e Shtetit planifikon që kosto për gjyq të arrijë në 15 mijë lekë për vitin 2018, për të shkuar në total në 175 milionë lekë. Nënvizojmë që bëhet fjalë vetëm për kostot e asistencës juridike në mbrojtjen e interesave pasurore të Shtetit Shqiptar, nëpërmjet këshillimit dhe përfaqësimit në çështjet gjyqësore në të cilat është palë një organ i administratës shtetërore ose Republika e Shqipërisë. Aty nuk përfshihen kostot për arkën e shtetit në rastet e gjyqeve të humbura, si brenda, ashtu edhe jashtë vendit.
Trafiku i padive nëpër gjykatat administrative
“Scan Magazine” ka zbardhur të dhënat zyrtare të Ministrisë së Drejtësisë, sipas të cilave, në vitin 2015 numri i çështjeve civile administrative të shqyrtuara nga Gjykatat Administrative të Shkallës së Parë, arrin në 17,927 çështje duke pësuar një ulje prej 925 çështjesh krahasuar me vitin 2014. Në krahasim me vitin 2013, ka një rritje me 17,518 çështje.
Në vitin 2016 numri i çështjeve civile administrative të shqyrtuara nga Gjykatat Administrative të Shkallës së Parë, arrin në 20,365 çështje duke pasur një rritje prej 2,438 çështjesh krahasuar me vitin 2015. Në krahasim me vitin 2014, ka një rritje me 1,513 çështje të shqyrtuara.
Për vitin 2017 numri i çështjeve civile administrative të shqyrtuara nga Gjykatat Administrative të Shkallës së Parë, arrin në 17,451 çështje duke pasur një ulje prej 2,914 çështjesh krahasuar me vitin 2016. Në krahasim me vitin 2015, ka një rritje me 476 çështje të shqyrtuara.
78 mijë padi civile
Për vitin 2017 numri i padive civile të përfunduara së shqyrtuari nga Gjykatat e Shkallës së Parë dhe nga Gjykatat Administrative, arrin në 78,200. Nga këto padi civile, ato të cilat janë me palë kundërshtare arrijnë 37,931, ndërsa paditë civile pa palë kundërshtare të përfunduara së shqyrtuari nga Gjykatat e Shkallës së Parë dhe ato Administrative, janë rreth 40,271.
Në vitin 2017 nga Gjykatat e Shkallës së Parë në rang Republike, janë gjykuar 1,676 padi civile me palë më pak krahasuar me paditë civile me palë të përfunduara së shqyrtuari nga Gjykatat e Shkallës së Parë dhe Gjykatat Administrative në vitin 2016 si edhe 243 padi civile me palë më shumë krahasuar me numrin e padive civile me palë të shqyrtuara në vitin 2015.
Në vitin 2017 nga Gjykatat e Shkallës së Parë dhe Administrative, janë gjykuar 2,931 padi civile me palë më pak krahasuar me paditë civile me palë të përfunduara së shqyrtuari nga Gjykatat e Shkallës së Parë në vitin 2014. Krahasuar me vitin 2013 kanë përfunduar së shqyrtuari 12,422 padi civile me palë kundërshtare më shumë për vitin 2017.
Volumi i çështjeve tregtare dhe kontraktuale
Për vitin 2015 nga Gjykatat e Shkallës së Parë janë shqyrtuar 393 çështje tregtare. Nga këto; 40 kërkesa tregtare pa palë kundërshtare. Nga këto; 1 kërkesë ka për objekt për emërim administratori, 1 kërkesë për ndërrimin e emrit të shoqërisë, 1 kërkesë për ndryshimin e numrit të ortakëve dhe 1 kërkesë për ndryshimin e kapitalit themelor. Po ashtu janë shqyrtuar edhe 36 kërkesa të tjera të përgjithshme pa palë.
Për vitin 2016 nga Gjykatat e Shkallës së Parë janë shqyrtuar gjithsej 204 çështje tregtare. Nga këto; 48 kërkesa tregtare pa palë kundërshtare. Nga këto; 4 kërkesa kanë për objekt për emërim administratori, 1 kërkesë për ndërrimin e emrit të shoqërisë, 1 kërkesë për ndryshimin e numrit të ortakëve. Po ashtu, janë shqyrtuar edhe 42 kërkesa të tjera të përgjithshme pa palë.
Në vitin 2017 nga Gjykatat e Shkallës së Parë janë shqyrtuar gjithsej 592 çështje tregtare. Nga këto; 322 kërkesa tregtare pa palë kundërshtare. Nga këto; 2 kërkesa kanë për objekt për emërim administratori, 1 kërkesë për ndryshimin e kapitalit themelor. Po ashtu, janë shqyrtuar edhe 319 kërkesa të tjera të përgjithshme pa palë.
Për vitin 2017 numri i padive të tjera kontraktuale të shqyrtuara është 2,159 me një ulje prej 389 padi më pak se numri i padive të shqyrtuara në 2016. Duke krahasuar vitin 2017 me vitin 2015 vihet re se numri i padive të tjera kontraktuale të shqyrtuara për këtë vit është rritur me 248 padi më shumë. Në krahasim me vitin 2014, vihet re se numri i padive të tjera kontraktuale të shqyrtuara në vitin 2017 është rritur me 860 padi më shumë. Ndërsa në krahasim me vitin 2013 vihet re një rritje shumë e madhe e padive të tjera kontraktuale me 831 padi të shqyrtuara në vitin 2017.
Rriten paditë për çështje pronësie
Në vitin 2016 numri i padive të pronësisë të shqyrtuara nga Gjykatat e Shkallës së Parë dhe Administrative arrin në 1,595. Në vitin 2016 numri i padive të pronësisë është 213 çështje më shumë se në vitin 2015. Në vitin 2016 nga të gjitha Gjykatat e Shkallës së Parë janë shqyrtuar 596 padi pronësie më shumë në krahasim me vitin 2014. Në krahasim me vitin 2013 numri i padive të pronësisë të shqyrtuara është 6931 padi më shumë për vitin 2016. Në krahasim me vitin 2012 numri i padive të pronësisë të shqyrtuara është 674 padi më shumë për vitin 2015
Në vitin 2017 numri i padive të pronësisë të shyrtuara nga Gjykatat e Shkallës së Parë dhe Administrative arrin në 1,911 çështje të përfunduara. Në vitin 2017 numri i padive të pronësisë është 316 çështje më shumë se në vitin 2016. Në vitin 2017 nga të gjitha Gjykatat e Shkallës së Parë janë shqyrtuar 529 padi pronësie më shumë në krahasim me vitin 2015. Në krahasim me vitin 2014 numri i padive të pronësisë të shqyrtuara është 916 padi më shumë për vitin 2017. Në krahasim me vitin 2013 numri i padive të pronësisë të shqyrtuara është 1,009 padi më shumë për vitin 2017.
Ngërçi i Gjykatës së Lartë
Ngërçi i plotë në të cilin janë zhytur gjykatat kryesore në vend penalizon veçanërisht kategorinë e pronarëve. Vetëm në katër muajt e parë të vitit, ka arritur në 427 numri i ankimimeve në gjykata nga pronarët ndaj vendimeve të Agjencisë së Trajtimit të Pronave. Ndërkaq, sipas të dhënave zyrtare të kësaj Agjencie, viti 2017 është mbyllur me një total prej 856 padish kundër saj rezultonin të depozituara në gjykatat e shkallëve të para si dhe në apelet administrative.
Volumi i madh i padive ka vijuar edhe gjatë muajve të deritanishëm. Rreth 300 padi kanë përfunduar në Gjykatën e Lartë, ndërkohë që disa dhjetëra janë paraqitur nëpër Gjykatat Administrative. Ajo që i ul ndjeshëm pritshëmritë e pronarëve për të gjetur zgjidhje në dyert e gjyqësorit është veçanërisht ngërçi i plotë i Gjykatës së Lartë.
Ndërkohë që numri i çështjeve në pritje të shqyrtimit nga kjo gjykatë i ka kaluar 26 mijë, numër që pritet të shtohet duke qenë se nuk ka asnjë sinjal që plotësimi i saj me anëtarë do të ndodhë së shpejti. Gjykata e Lartë numëron aktualisht vetëm 4 anëtarë nga 19, të cilët alternohen për të krijuar trupa të nevojshme për të zgjidhur vetëm çështjet emergjente me afat. Ndërkohë që ekspertë të ndryshëm thonë se plotësimi i saj me anëtarë mund të kërkojë edhe dy vjet të tjerë.
SCAN Magazine
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.