Paga mesatare, 52 600 lekë – Është rritur me 4.5% krahasuar me një vit më parë
Paga mesatare bruto në ekonomi ka arritur në 52 600 lekë në muaj. Mbështetur në të dhënat e Drejtorisë së Përgjithshme të Tatimeve, të përpunuara nga Instat, për tremujorin e dytë 2019 paga mesatare u rrit me 4.5% krahasuar me të njëjtën periudhë të një viti më parë. Statistikat e pagave konfirmojnë më tej ecurinë pozitive të tregut të punës, ku shkalla e papunësisë është në nivelet më të ulëta, ndërsa punësimi në ato më të larta të 30 viteve të fundit.
Sektori që ofron pagat më të larta në ekonomi ngelet ai financiar, ku çdo i punësuar paguhet mesatarisht 111 mijë lekë në muaj. Vijon sektori i informacionit dhe komunikimit, ku paga mesatare mujore është rreth 88 mijë lekë në muaj dhe sektori publik, me një pagë mesatare prej 63 mijë lekësh.
Ndërkohë, puna më pak e paguar në Shqipëri është ajo në shërbimet e tregtisë, hotelerisë dhe bar-restoranteve, me 39 mijë lekë në muaj.
Në statistikat që mbështeten në të dhënat administrative, megjithatë, mund të ketë edhe marzhe pasaktësie, të lidhura me informalitetin në sektorin privat. Pagesat informale janë ulur ndjeshëm në vitet e fundit, por ato ngelen të pranishme, sidomos për nivelet më të larta të pagave, ku kosto e deklarimit është më e madhe. Kjo është edhe një nga arsyet pse paga mesatare ngelet ndjeshëm më e lartë në sektorin publik. Sipas Instat, në shtet paga mesatare është rreth 63 mijë lekë në muaj, ndërkohë, në sektorin privat paga mesatare është rreth 48 mijë lekë.
Ersuin Shehu / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.