Paga minimale në Gjermani – Në 9.19 euro, më e ulëta në Europën perëndimore

Pagat minimale janë rritur në të gjithë Bashkimin Europian, megjithatë, Gjermania renditet nga fundi i vendeve të Europës Perëndimore, sipas një raporti të fondacionit Hans Böckler.

Raporti tregoi se Gjermania rezultoi në vend të parafundit, me 9.19 euro për orë (10.35$),  pavarësisht rritjes me 35% më herët gjatë vitit. Gjermania mposhti vetëm Mbretërinë e Bashkuar, me një pagë minimale prej 7.83 paund që vlen tashmë 8.85 euro.

Megjithatë, kjo e fundit është rezultat i rënies së paundit nga referendumi për Brexit. Pavarësisht se pagat gjermane ishin më të larta në krahasim me vendet e Europës Lindore e Jugore, punëtorët janë ende të cenuar nga varfëria.

Paga minimale, që arrin në rreth 1,146 euro në muaj pas taksave dhe kontributeve sociale,  mezi kalon kufirin e varfërisë dhe përbën vetëm 48% të të ardhurave mesatare kombëtare.

Për krahasim, vende si Turqia ofrojnë një pagë minimale prej rreth 74% të të ardhurave mesatare kombëtare, ndërsa në Portugali, shifra arrin në 61%.   Pavarësisht se Gjermania ka një reputacion për qiratë dhe kostot e lira të jetesës krahasuar me standardet e Europës Perëndimore, paga minimale ka mbetur pas.

Sipas raportit, rritja e pagës minimale arriti një mesatare prej 2.7% në 22 Shtete, por rritja ishte më e ngadaltë në vendet perëndimore.

Më herët gjatë vitit, Ministri i Punës Hubertus Heil, lajmëroi se Gjermania do të përpiqet të caktojë një pagë minimale europiane, kur të marrë presidencën e Këshillit Europian në 2020.

Kjo do të afrojë Europën drejt objektivave të 2020-ës dhe do të nxjerrë 20 milionë njerëz nga rreziku i varfërisë. Nga ana tjetër, një trend rritës i pagës minimale është vëzhguar në vendet jugore dhe lindore.

Në Greqi, paga minimale u rrit për të parën herë në 7 vite, në 3.76 euro për orë, ndërsa ajo spanjolle me 11%, në 5.45 euro.

Pavarësisht se Italia, Austria dhe vendet Nordike nuk kanë pagë minimale, raporti theksoi se atje ka një nivel të lartë të marrëveshjeve kolektive.

Gjermania ka vonuar në adaptimin e një page minimale kombëtare, duke e prezantuar në vitin 2015.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.