Pagat e gjyqtarëve të shkarkuar – Kursehen rreth 1.3 milionë dollarë nga fondi për rrogat e pa tërhequra
Ndërsa na ka lënë pa gjyqtarë dhe ka krijuar një mori pasojash negative, duke qenë se ka shkarkuar afërsisht gjysmën e magjistratëve të kaluar në sitë, Vetting-u po i sjell të paktën një efekt pozitiv xhepave të taksapaguesve shqiptarë. Rreth 1.3 milionë dollar janë kursyer nga buxheti i vitit 2020 për shkak të pagave të pashpërndara për gjyqtarët e larguar nga sistemi, një kohë që ata janë zyrtarët me rrogat më të larta në administratë, të cilat shkojnë deri në 3 mijë dollarë në muaj.
Scan Televizion ka zbardhur vendimin e 7 korrikut të Këshillit të Lartë Gjyqësor, I cili ka pakësuar me rreth 1.3 milionë dollar fondet buxhetore për vitin 2020. Institucioni që qeveris gjykatat në vend ka vendosur rishikimin buxhetit për vitin 2020, në programin e KLGJ-së, “Planifikim, Menaxhim, Administrim”, duke pakësuar fondet buxhetore në shpenzime personeli (paga- 600), në shumën prej 13,000,000 lekë.
Në programin e gjykatave, Këshilli i Lartë Gjyqësor ka pakësuar fondet buxhetore në shpenzime personeli në shumën prej 140,000,000 lekë, i ndarë në (paga-600) 128,000,000 lekë dhe (sigurime shoqërore – 601) 12,000,000 lekë.
Në mënyrë më të specifikuar, Fondi prej 128,000,000 lekë pakësohet: 48,000,000 lekë në shpenzime për pagat e Gjykatës së Lartë dhe 80,000,000 lekë në shpenzime për paga të mbajtura të pashpërndara.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.