Pagat, “mollë sherri” – Shtyhet miratimi i buxhetit nen për nen, pezull propozimi për rritjen e pragut
Propozimi i deputetëve por edhe i bizneseve për rritjen e pragut të pagës së pataksueshme në 40 mijë lekë nga 30 mijë lekë që është aktualisht, duke se është kthyer në “mollë sherri” midis i Komisionit të Ekonomisë dhe Financave dhe Ministrisë së Financave.
Ndërsa ishte parashikuar që Komisioni të shqyrtonte projekt buxhetin dhe paketën fiskale për vitin 2019, Kryetari Erion Braçe ka zhvilluar një mbledhje paraprake me deputetët pa praninë e kamerave, ku ka marrë pjesë për disa minuta edhe Ministri i Financave Arben Ahmetaj.
Pasi ka përfunduar mbledhja për rreth 25 minuta, Kryetari i Komisionit Erion Braçe ka njoftuar se shqyrtimi i buxhetit do të shtyhet për një moment të dytë. Propozimi për pagat është shoqëruar me debat të nxehtë gjatë diskutimeve 3 javore në komisione të draftit të buxhetit, ku Ahmetaj u shpreh kategorikisht kundër me argumentin se prishej formula e progresivitetit ndërsa sfidoi deputetët me dy variante që taksonin të gjitha pagat.
Ndërsa nga ana tjetër, Braçe, u tregua i vendosur për ti shkuar deri në fund këtij propozimi. Kërkesa e Komisionit për tatim zero për në pagat 40 mijë lekë, nëse miratohet, do të thotë, 1300 lekë shtesë në muaj për çdo individ të punësuar, apo 15.600 lekë më shumë në pagë në vit.
Aktualisht pagat deri në 30 mijë lekë e kanë zero tatimin, ndërsa mbi këtë nivel deri në 130 mijë lekë taksohen me 13 për qind. Në fashën e punonjësve që paguhen 30-40 mijë lekë janë rreth 70 mijë individë në vend.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.