Pagat për policinë, Tahiri: Rritja për 11 mijë punonjësit llogaritet me 50 për qind

“Këtë vit, që nga 1 Marsi ka filluar rritja e pagave për të gjithë punonjësit e Policisë. Për të 11 mijë punonjësit e Policisë rritet paga si kurrë më parë”. 

Kështu është shprehur ministri i Brendshëm Tahiri, gjatë një takimi me punonjësit e policisë ku ndër të tjera theksoi se “Rriten pagat për çdo punonjës policie. Dhe për punonjësit e rolit bazë, pra për ata që janë në terren dhe që përballen me sakrifica të përditshme, ata që e kanë detyrën më të vështirë, ata që i shërbejnë qytetarëve, ata që përballen me krimin dhe më të gjithë ata që shkelin ligjin, rritja e pagës në total shkon deri në 50%. Qeveria a kaluar jo vetëm që nuk i rriti pagat, por i uli me 4%. Ndërkohë, nga ky vit, nga 1 Marsi qeveria vendos dhe fillon implementimi i sistemit të ri të pagave”, tha ministri i Brendshëm.

Sipas Tahirit, kjo është rritja më e madhe e pagave që ka ndodhur ndonjëherë në Policinë e Shtetit.

“Ky është vlerësimi ynë më i madh për të gjithë ata që punojnë ndershmërisht në Policinë e Shtetit. Kjo është mirënjohja jonë më e madhe për të gjithë ata që kanë sakrifikuar dhe vazhdojnë të sakrifikojnë për ta bërë Shqipërinë më të drejtë, më të sigurt, për t’i bërë qytetet, lagjet tona më të sigurta dhe për t’u shërbyer më mirë qytetarëve. Nga ana tjetër po dje, qeveria ka miratuar një vendim shumë të rëndësishëm për t’u solidarizuar dhe për të ndihmuar çdo punonjës policie që ka pasoja nga përballja e tij me luftën kundër krimit” pohoi ministri Tahiri.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.