Pagat, tetë mijë mësues përjashtohen nga rritja 

Kanë dhënë mësim për më shumë se 20 vite, gëzojnë të tria shkallët e kualifikimit, por nuk trajtohen ekonomikisht me shtesë mbi pagë njësoj si kolegët e tyre mësues.

Bëhet fjalë për ata me arsim të mesëm pedagogjik të para disa viteve, ku me vendimin e qeverisë u është ulur paga bazë, një ndër treguesit mbi të cilët përllogaritet shtesa prej 10 % që duhet ta marrin që prej muajit mars. Shqetësimin e ngre Sindikata e Pavarur e Arsimtarëve të Shqipërisë nëpërmjet përfaqësueses së saj për Tiranën, Alma Lama, e cila shprehet e vendosur për t’i shkuar deri në fund këtij problem që prek një numër të konsiderueshëm mësuesish.

“Kemi 8 mijë mësues me arsim të mesëm, me titullin ‘mjeshtër’  me mbi 20 vite punë, që nuk kanë marrë shtesë mbi pagë. Prej muajsh i kemi kërkuar Ministrisë së Arsimit për trajtimin e kësaj çështje. Kemi marrë përgjigje pozitive, por asgjë konkrete. Mësuesit duhet ta marrin këtë të drejtë të mohuar prej disa muajsh”, tha Lama për gazetën “Panorama”.

Më 8 mars, qeveria shpalli vendimin nr.175 “Për trajtimin me pagë dhe shtesa mbi pagë të punonjësve arsimore në arsimin parauniversitar”. Këta tregues përllogariten mbi pagën bazë, e cila u rikategorizua bazuar në llojin e diplomës, pagën bazë prej 14 mijë lekësh, do ta gëzonin vetëm ata që kishin një diplomë të ciklit të dytë, ndërsa ato me bachelor një pagë prej 11 mijë lekësh. Më 19 prill qeveria shpalli një VKM të dytë që kategorizonte vetëm mësuesit me një diplomë të ciklit të parë.

Sot janë të angazhuar rreth 38 mijë mësues në arsimin publik parauniversitar, ku 1/5 e të cilëve nuk përfituan nga vendimi për të rritur nivelin e pagave.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.