Pagesa për ambientet e përbashkëta, Bejko: Po diskutojmë nivelin, do paguhet me faturën e ujit
Pagesa për mirëmbajtjen e ambienteve të përbashkëta në kryeqytet do të bëhet përmes faturës së ujit. Drejtori i Bashkëpronësisë, në Bashkinë e Tiranës, Erindi Bejko, i ftuar në studion e TV SCAN tha se aktualisht po diskutohen nivelet e kësaj pagese, ndërsa janë gati ndryshimet ligjore që pritet të zgjidhin një sërë problematikash për banorët.
Sipas Bejkos, pagesa e administratorëve do të bëhet nga vetë banorët, ndërkohë që ata do të kenë të drejtë të vendosin edhe gjoba, në rastet kur konstatojnë shkelje.
Sipas Drejtorit të Bashkëpronësisë, i gjithë procesi i administrimit të ambienteve të përbashkëta, sipas kërkesave të legjislacionit në fuqi do të përmbyllet tërësisht në korrik të vitit 2018.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.