Pagesat e sigurimeve – Profesionet e lira, “të lirë” për të zgjedhur masën
Të gjithë ata që janë të vetëpunësuar, ose siç njihen ndryshe profesionet e lira do të paguajnë një mase kontributi sipas përzgjedhjes së tyre. Komisioni i Ekonomisë shqyrtoi aktin normativ të qeverisë që rregullon llogaritjen e kontributeve për profesionet e lira.
Zëvendësministri i Financave, Ervin Mete, u shpreh gjatë prezantimit të këtij drafti, se parashikohet se kontributet e detyrueshme të sigurimeve shoqërore për personin e vetëpunësuar, përfshirë punëdhënësin e vetëpunësuar, llogariten si përqindje mbi një pagë bruto, jo më të ulët se paga minimale në shkallë vendi dhe jo më të lartë se paga maksimale.
Akti normativ i miratuar me vendim të Këshillit të Ministrave, vjen pas vendimit të Gjykatës Kushtetuese që rrëzoi ligjin e qeverisë për kontributet e profesioneve të lira.
Ligji u ankimua në Gjykatën Kushtetuese më argumentin se cenonte Kushtetutën dhe rrezikonte t’i falimentonte këto profesione duke deformuar tregun.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.