Pagesat për prodhuesit e energjisë/ Enti Rregullator vendos çmimin, qeveria do i paguajë 7.448 lekë/kwh

Enti Rregullator i Energjisë ka vendosur çmimin me të cilin qeveria do të blejë energjinë e prodhuar nga prodhuesit me përparësi të energjisë elektrike.

Sipas vendimit të ERE-s,çdo kwh i prodhuar do të blihet me 7.448 lekë, ndërkohë që ky çmim nuk ka pësuar ndryshim në raport me vendimet e fundit, të miratuar në qershor dhe dhjetor të vitit të kaluar.

Megjithatë, në vendimin e fundit saktësohet se ky çmim do të jetë në fuqi deri në  publikimin  e  raportit  vjetor  të  Bursës  Hungareze  të Energjisë  (HUPX),  si  dhe  publikimet  e  Bankës  së  Shqipërisë  për  kursin  e  këmbimit Lekë/EURO,  që janë pjesë  e formulës së përllogaritjes së çmimit. Pavarësisht se çmimi për këtë vit nuk ka pësuar ndryshim, vitin që shkoi ai pësoi në ulje me 0.6 lekë/kwh.

Kjo pasi qeveria vendosi ndryshimin e bonusit për promovimin e burimeve të rinovueshme nga 1.3 në 1.2, një koeficient që është pjesë e metodologjisë mbi bazën e së cilës përllogaritet çmimi vjetor me të cilin hidrocentralet deri në 15 MW shesin energjinë elektrike. Vendimi i ERE-s është marrë në zbatim të këtij vendimi, që gjithsesi është kundërshtuar nga prodhuesit e energjisë elektrike.

Sipas Shoqatës Shqiptare të Energjisë së Rinovueshme,  që përfaqëson mbajtësit e kontratave koncesionare ky ndryshim është një goditje për investimet e kryera në këtë sektor, ndërkohë që paralelisht cenohet edhe siguria juridike e kontratave koncesionare.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.