Pagesë shtesë për të vetëpunësuarit/ Sigurime për sëmundjet dhe aksidentet në punë
Të vetëpunësuarit e regjistruar në Qendrën Kombëtare të Biznesit si “person fizik” do të duhet të paguajnë më shumë kontribute. Një projektligj i hartuar së fundmi nga Ministria e Financave dhe Ekonomisë, “Për sigurinë dhe shëndetin në punë”, i ndryshuar”, i cili është hedhur për konsultim, ka si qëllim që të përfshijë në gamën e zbatimit të ligjit edhe të punësuarit me kohë të plotë, kohë të pjeshme apo edhe me punësim të përkohshëm.
Ndërsa një ndryshim i qenësishëm bëhet duke përfshirë konceptin e “të vetëpunësuarit”, si një rekomandim i Këshillit të Bashkimit Europian, me qëllim trajtimin e kësaj kategorie si çdo punëmarrës tjetër, në kuptim të sigurisë dhe shëndetit në punë.
Në projektligj thuhet se aksidentet në punë dhe sëmundjet profesionale, përsa i përket kategorisë së personave të vetëpunësuar, kanë kosto të lartë ekonomike, sociale dhe humane.
Sipas draftit, aktualisht të vetëpunësuarit paguajnë kontribute sigurimesh për efekt të barrëlindjes dhe të pensioneve (përfshihet pension pleqërie, pension invaliditeti dhe pension familjar). Ndërsa nënvizohet se kjo kategori nuk paguan kontribute sigurimesh për sëmundjet, aksidentet në punë dhe sëmundjet profesionale dhe për papunësinë.
Dhe në këtë, në zbatim të këtij ligji, rast priten vendimet e Këshillit të Ministrave që do të përcaktojnë detyrimet e posaçme për të vetëpunësuarit.
Objekt të ligjit janë të vetëpunësuarit të cilët mund ta ushtrojnë veprimtarinë ekonomike me këto statuse: “i vetëpunësuar i vetëm”, “i vetëpunësuar me punëmarrës”, “i vetëpunësuar me punëmarrës dhe punonjës të papaguar të familjes”, “i vetëpunësuar pa punëmarrës me punonjës të papaguar të familjes”.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.