Pak shpresë për Gjermaninë – Rimëkëmbet tregtia dhe industria në Mars
Eksportet gjermane u rritën papritur në muajin Mars, duke rritur shpresat për një rimëkëmbje të ekonomisë më të madhe të Europës, pavarësisht pasigurive nga lufta tregtare. Zyra Federale e Statistikave deklaroi se eksportet janë rritur me 1.5% gjatë muajit, ndërsa importet, me 0.4%.
Sufiçiti tregtar u rrit në 20 miliardë euro në Mars, nga 18.7 miliardë euro që ishte në muajin e kaluar. Qeveria gjermane uli së fundmi projeksionet për rritjen ekonomike në vitin 2019, në 0.5%. Ndër faktorët që po ndikojnë te prodhuesit gjerman të varur nga eksportet janë; konflikti tregtar mes Shteteve të Bashkuara dhe Kinës e Bashkimit Europian, ngadalësimi i ekonomisë botërore si dhe pasiguria nga Brexit.
Ngadalësimi i madh është lidhur gjithashtu me faktorë të brendshëm si problemet në industrinë e makinave, ku kompanitë po hasin vështirësi me përshtatjen ndaj rregullave të ashpra të ndotjes. Prodhimi industrial u rrit papritmas në muajin Mars, por Ministria e Ekonomisë deklaroi se perspektiva qëndron e dobët. Ngadalësimi ekonomik ka bërë që Qeveria të rishikojë në rënie të ardhurat nga taksat.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.