“Pakësohen” shqiptarët në Itali – Bien me 41 mijë, të ardhurit, jo më për punë
Shqiptarët në Itali janë pakësuar, thonë të dhënat e fundit të Institutit Italian të statistikave, të sapopublikuara. Por, këto të dhëna janë ”gënjeshtare”.
Shqiptarët në Itali mund të jenë pakësuar si status juridik, por realisht kjo nuk është e vërtetë, pasi një pjesë e madhe e tyre kanë marrë nënshtetësinë, duke u bërë përpara ligjit italianë.
Të dhënat e Istat tregojnë kështu se, në vitin 2016 kishte 482.959 shtetas të huaj me leje qëndrimi në Itali që ishin shqiptarë. Në vitin 2017, kjo shifër zbriti çuditërisht në 441.838 mijë.
Vetë Istat thotë se, kjo rënie, vjen si pasojë e marrjes së nënshtetësisë, por edhe si pasojë e rënies së fluksit në hyrje. Me 441 mijë shtetas me leje qëndrimi në shtetin fqinj, shqiptarët janë grupimi i dytë më i madh në Itali, pas atyre nga Maroku.
Të dhënat i referohen periudhës nga 1 Janari 2016 deri në 1 Janar të këtij viti. Pavarësisht se në rënie, shqiptarët vijojnë të mbeten grupimi i dytë më i madh i të ardhurve, por pas Nigerisë, duke lënë në vend të tretë Marokun.
Në vitet 2015-2016 janë rreth 35 mijë shtetas shqiptarë që kanë hyrë rregullisht në vend duke u pajisur me leje qëndrimi. Pjesa dërrmuese e tyre kanë deklaruar se motivi i ardhjes në Itali është familjar, dhe jo për punë, arsim apo shkaqe humanitare.
Të dhënat e 2016-ës tregojnë se 68.99% e të ardhurve nga Shqipëria ishin për arsye familjare, dhe vetëm7.2% për arsye pune. Pavarësisht se është shifër e ulët, kjo është norma më e lartë mes vendeve kryesore.
Vihet re gjithashtu një rënie e numrit të atyre që shkojnë në vendin fqinj për arsye studimi. Një tjetër e dhënë tregon qartë llojin e emigrimit të ri të shqiptarëve drejt Italisë, pra jo më personal, por në pjesën dërrmuese të rasteve, në formën e bashkimit familjar.
Thuajse 40% e familjeve shqiptare në Itali janë të tipologjisë së një çifti me fëmijë, dhe kjo është norma më e lartë mes të huajve të tjerë. Vetëm 16.9% e familjeve shqiptare përbëhen nga një person i vetëm, tregon Istat.
Situata jo e mirë ekonomike që ka kaluar dhe po kalon Italia së fundmi, por edhe trendi i ri për vendet e Europës veriore, shpjegon qartë mungesën e interesit të shqiptarëve për të emigruar drejt fqinjëve, ku cikli tashmë mund të quhet i mbyllur.
Në vitet në vijim, shqiptarët në Itali do të bëhen gjithmonë e më shumë italianë, ndërkohë që gjithmonë e më pak do të shkojnë në vend, duke ulur për rrjedhojë numrin e emigrantëve shqiptarë në Itali.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.