Paketa fiskale 2019, Ahmetaj: 91% e bizneseve do paguajnë 5% tatim fitimi, ja kush përfiton
Ministri i Financave dhe Ekonomisë, Arben Ahmetaj ka rikonfirmuar edhe një herë faktin se paketa e re fiskale, që do të hyjë në fuqi në datën 1 janar 2019 do të ulë tatimin e fitimit nga 15% në 5% për një kategori të madhe biznesesh.
Ne prag të prezantimit të draftit final dhe nisjes së diskutimeve në Kuvend, përmes një postimi në rrjetin social ‘Facebook’, kreu i Financave deklaroi se nga kjo lehtësi fiskale pritet të përfitojnë rreth 91% e bizneseve që operojnë në vend.
Ndërkaq, referuar të dhënave të bëra publike më herët nga ky dikaster, janë 3 kategori biznesesh, që do të përfitojnë reduktimin e tatimit të fitimit. Në kategorinë e parë bëjnë pjesë ato biznese me xhiro vjetore 8-14 milion lekë, që përbëjnë edhe pjesën më të madhe të përfituesve.
Gjithashtu, pjesë e reduktimit të tatimit pritet të jenë edhe Shoqëritë e Bashkëpunimit Bujqësor si dhe ato biznese që do të kategorizohen si ‘Agroturizëm’ sipas kritereve që tashmë janë miratuar nga Këshilli i Ministrave. Paketa e re fiskale pritet të sjellë një sërë risish edhe në sektorin energjetik, duke qenë se panelet diellore do të jenë të përjashtuara nga Tatimi mbi Vlerën e Shtuar.
Kjo masë pritet të nxisë edhe më tepër prodhimin e energjisë nga dielli, një hap tejet i rëndësishëm për diversifikimin e burimeve të prodhimit të energjisë, duke qenë se vendi ynë aktualisht është 100% i varur nga energjia hidrike.
Nga ana tjetër lehtësi pritet të përfitojë edhe sektori i hoteleri-turizmit, pasi reduktimi i TVSH-së nga 20% në 6% nuk do të aplikohet vetëm për akomodimin, por edhe për restorantet dhe pijet joalkoolike në hotele.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.