Paketat për të sëmurët me kancer, Shehu: Buxheti nuk mbulon as nevojat e 45% të pacientëve me Kemioterapi
Të sëmurët me kancer vijojnë të kenë problem në sigurimin e trajtimit të tyre. Në vazhdimësi flitet për mungesë të medikamentit bazë për trajtimin e këtyre të sëmurëve siç është Herceptina.
Sipas ish Ministrit të Shëndetësisë dhe deputetit të Partisë Demokratike Tritan Shehu në vendin tonë nuk mungon vetëm Herceptina, por ka një krizë për të gjithë kemiopreparatet e shtrenjta.
”Mungon edhe Radioterapia korrekte dhe e përshtatshme për shumicën e pacientëve. Buxheti ynë nuk mbulon as nevojat e 45% të pacientëve për Kemioterapi, pa folur për atë të personalizuar, që jemi shumë larg.”
Më tej Shehu ngre pikëpyetjen se sa pacientëve u sigurohet trajtimi me radioterapi. Së fundmi Këshilli i Ministrave ka miratuar rimbursimin e paketës së radioterapisë. Kështu referuar paketave të trajtimit çdo i sëmurë do përfitojë me rimbursim nga 1 deri në 10 seanca trajtim paliativ, ku një seancë kushton mbi 7 mijë lekë.
Paketa e trajtimit adjuvant/ neoadjuvant e cila ka 15 deri në 33 seanca trajtimi do të ofrohet me rimbursim për pacientët dhe ka një kosto për seancë në vlerën e 5700 lekë. Një tjetër paketë që do të rimbursohet është paketa e trajtimit radikal e cila ofrohet nga 15 deri në 33 seanca dhe kosto e një seancë është mbi 6 mijë lekë.
Dhe paketa e fundit e pacientëve që trajtohen me radioterapi është paketa e trajtimit me IMRT ku një seancë kushton mbi 6mijë lekë dhe një pacienti i duhet të kryej nga 15 në 39 seanca.
Sipas parashikimeve të Ministrisë së Shëndetësisë fillimi nga puna i akseleratorit linear për pacientët që trajtohen me radioterapi do të jetë në vlerën e 8 miliardë lekëve duke përfshirë këtu edhe 5 citostatikë të rinj për trajtimin e kancerit të gjirit.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.