Pakti Shqipëri-Kosovë, problem me dividentin – Qeveria modifikon marrëveshjen për shmangien e tatimit të dyfishtë dhe evazionit
Ndërsa shmang tatimin e dyfishtë lidhur me tatimet mbi të ardhurat dhe mbi kapitalin, Marrëveshja e vitit 2014 mes Shqipërisë e Kosovës për shmangien e tatimit të dyfishtë, lidhur me tatimet mbi të ardhurat dhe mbi kapitalin krijon hapësira për paqartësi lidhur me dividentin e kompanive të të dy vendeve. Shkak për të cilin Këshilli i Ministrave po amendon marrëveshjen për t’u krijuar kompanive në të dy vendet kushtet për shmangien e vështirësive në përfitimin e dividentit.
Në relacionin e draftit të amendimeve të depozituar tashmë në Kuvend, Këshilli I Ministrave sqaron se Iniciativa për hartimin e protokollit ndryshues të marrëveshjes së sipërcituar, fillimisht u ndërmor pasi autoritetet zbatuese hasën vështirësi nga zbatimi në praktikë i nenit 10 “Dividentët”, ku sipas marrëveshjes në fuqi nuk del e qartë mundësia e mbajtjes së tatimit mbi dividendin në vendin e burimit. Ky shqetësim u ngrit nga Drejtoria e Përgjithshme e Tatimeve gjatë zbatimit në praktikë të këtij neni.
“Për sa më sipër dhe duke pasur parasysh rëndësinë dhe nevojshmërinë që paraqet ndryshimi i këtij neni të marrëveshjes, pala jonë nëpërmjet rrugëve diplomatike ka paraqitur kërkesën për amendimin e nenit 10 ”Dividentët” të marrëveshjes”, thekson Qeveria në relacionin dërguar Kuvendit.
Më tej Këshilli I Ministrave bën me dije se Ndërkohë, nëpërmjet komunikimit të vazhdueshëm ndërmjet palëve, si dhe negociatave të zhvilluara on-line nëpërmjet platformës webex, në datën 10.9.2020, u dakordësua një protokoll ndryshimi i marrëveshjes, i cili, përveç ndryshimit të nenit 10 të marrëveshjes, përmban dhe nene të tjera, të cilat kryesisht kanë për qëllim sigurimin e disa standardeve minimale ndërkombëtare për të luftuar erozionin e bazës së tatueshme dhe transferimin e fitimeve (BEPS – Base Erosion and Profit Shifting), në kuadër të projektit ndërkombëtar BEPS, pjesë e të cilit tashmë është dhe vendi ynë.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.