Panairi botëror i turizmit – Klosi: Bisedime me partnerët e rajonit për një ofertë të përbashkët
Mbyllet sot panairi më i madh botëror i turizmit ‘’World Travel Market” i zhvilluar në Londër, ku mori pjesë edhe Shqipëria. I pranishëm në këtë panair ishte edhe Ministri i Mjedisit dhe Turizmit, Blendi Klosi.
Në fjalën e tij, Klosi është shprehur se prezenca e Shqipërisë në këtë panair lidhet me objektivin e rëndësishëm, i cili është ofrimi i investitorëve të huaj të mundshëm strategjik në turizmin shqiptar si dhe ofrimin e paketës së re fiskale. Kjo e fundit, sipas tij, mbështet investimet e turizmit elitar në Shqipëri, hotelet me katër dhe pesë yje.
“Do të marrim lehtësirat fiskale më të mira në rajon dhe këto do t’ia prezantojmë të gjithë operatorëve të interesuar gjatë ditëve të panairit.”
Po ashtu, shtoi më tej se duke shfrytëzuar ambientet e panairit dhe kontaktet e përfaqësuesve të lartë të shteteve të rajonit, turistët e huaj do të mund ta shohin rajonin si një paketë të plotë turistike.
Sa i përket kësaj të fundit, Klosi deklaroi se po bëhen bisedime me partnerët e rajonit për të pasur një ofertë të përbashkët.
Sipas tij, falë prezantimit të Shqipërisë me një stendë goxha prestigjioze, vitin tjetër turizmi në Shqipëri do të ketë një nivel shumë më të lartë.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.