Panairi i Tregtisë Inverse – Sipërmarrjet kosovare takohen “kokë më kokë”
Oda Ekonomike e Kosovës ka organizuar për herë të dytë Panairin e Tregtisë Inverse, një panair ku nuk shiten produkte, por ka si synim të krijojë lidhje biznesi mes vetë sipërmarrjeve që marrin pjesë.
Panairi ka arritur të mbledhë ndërmarrje të vogla e të mesme nga sektori i agrobiznesit, shërbimeve dhe prodhimit nga e gjithë Kosova, përfshirë edhe biznese nga komunat me shumicë serbe.
“Bizneset dhe ekonomia nuk njohin kufij e dëshmojnë sot një prani bukur e madhe e bizneseve nga veriu i Mitrovicës, nga vendet e tjera të Kosovës dhe e tëra kjo projektit i jep një ngjyrë dhe rëndësi të veçantë”, u shpreh Safet Gërxhaliu, kryetar i Odës Ekonomike të Kosovës.
Vetë bizneset vlerësuan mundësitë që ky panair u ofron për t’u integruar si furnitorë në zinxhirët e vlerave në tregun vendor.
“Ky Panair na ndihmon shumë për shkak se njoftohemi me bizneset e tjera dhe me marr oferta të ndryshme”, u shpreh Shpëtim Myftari, sipërmarrës.
E pranishme në panair ishte edhe Ministrja e Tregtisë dhe Industrisë, Hykmete Bajrami, e cila vlerësoi suksesin e organizimit, përmes së cilit janë nënshkruar qindra kontrata mes bizneseve të ndryshme.
Ndërkohë, Sigrid Meijer, nga organizata “Swisscontact”, tha se ky panair do të ishte mirë të mbahet edhe në qytete të tjera.
“Ne mendojmë që ky koncept i cili është gjithashtu është praktikuar edhe në Amerikën Veriore ofron mundësinë që të njoftohen bizneset e vogla se çfarë kërkohet nga bizneset më të mëdha. Kështu ne në bashkëpunim me Odën Ekonomike vendosëm që të fokusohemi në hotelieri dhe restorante dhe të shohim se si mund t’i afrojmë ato më shume me prodhuesit nga ndërmarrjet e vogla”, u shpreh Meijer.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.