Panairi i turizmit mesdhetar në Tiranë – Ekonomi: Qeveria uli TVSH-në, 4.7 mln turistë vizituan Shqipërinë në 2016-ën

Çelet Panairi i Parë i Turizmit Mesdhetar. Iniciativa e organizuar nga “Expocity” në Tiranë vjen pak ditë pasi qeveria dërgoi një projektligj në Kuvend për uljen e TVSH-në nga 20 në 6 për qind për njësitë akomoduese.

Në fjalën e saj, ministrja e Ekonomisë, Milva Ekonomi, u shpreh se vendimi i qeverisë pritet të nxisë rritjen e cilësisë së shërbimeve. Ekonomi riktheksoi se sektori i turizmit ka ardhur në rritje dhe vetëm vitin e kaluar, Shqipëria priti rreth 4 milionë e 7 qind mijë turistë.

Nga ana e tyre, përfaqësuesit e unioneve dhe shoqatave të turizmit e quajtën një iniciativë pozitive mbajtjen e Panairit të Parë të Turizmit Mesdhetar në Tiranë. Ata kërkuan më shumë investime, kryesisht në fushën e edukimit.

Panairi mbahet në datat 8 dhe 9 prill dhe në këtë aktivitet marrin pjesë rreth 120 operatorë turistikë, të bashkuar në 72 stenda.

Organizatorët e këtij eventi thanë se në muajin shtator pritet të mbahet një tjetër panair i ngjashëm, në fokus të së cilit pritet të jetë promovimi i vlerave shqiptare.

Florenc Drizari/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.