Panariti në Prespë të Vogël – Diskutohet mundësia për shtimin e licencave të peshkimit

Ministri i Bujqësisë Edmond Panariti ka marrë pjesë në një inspektim në zonën e Pustecit në Prespë të Vogël. Qëllimi kryesor i vizitës së ministrit ishte njohja me problemet që shqetësojnë familjet fermere, banorët e Pustecit që merren kryesisht me bujqësi dhe peshkim.

“Ne jemi këtu për të diskutuar për problemet që ata kanë, që kryesisht kanë të bëjnë me licensat e reja të peshkimit, ndaj ne jemi të vendosur të shikojmë mundësinë e shtimit të numrit të licensave, duke respektuar njëkohësisht kriteret dhe standardet ekologjike të burimeve peshkore të liqenit, si edhe duke garantuar një ruajtje të rezervave peshkore të liqenit”, tha ministri Panariti.

Në axhendën e ministrit ishte edhe një takim i zgjeruar me banorët e zonës, ku tema e diskutimit ishin edhe problemet e ujit të pijshëm dhe atij për vaditje.

Ministri i Bujqësisë inspektoi nga afër edhe punimet e bëra në kanalet vaditëse. Pritshmëritë e kësaj ministrie janë që brenda muajit maj të përfundojë pastrimi i kanaleve ujitëse në të gjitha zonat e vendit. Ndërsa brenda 3 vjetësh pritet të pastrohet i gjithë rrjeti i kanaleve të kullimit dhe ujitjes, falë edhe investimeve në këtë fushë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.