Panariti: Të krijojmë Kodeksin Ushqimor Shqiptar. Siguria ushqimore të jetë prioritet i AKU

Ministri i Bujqësisë, Zhvillimit Rural dhe Administrimit të Ujërave, Edmond Panariti, mori pjesë në mbledhjen e Bordit të Autoritetit Kombëtar të Ushqimit, ku kërkoi krijimin e Kodeksit Ushqimor të Shqipërisë, si dhe apeloi që siguria ushqimore të jetë prioritet.

Ministri Panariti tha ndër të tjera se “Ka ardhur koha për krijimin e një dokumenti integral, për sa i përket cilësisë dhe sigurisë ushqimore të produkteve shqiptare, që do të jetë pika e referencës për të gjithë aktorët e fushës së ushqimit, prodhuesit, përpunuesit, ambalazhuesit dhe tregtuesit”.

Më tej theksohet se disa standarde janë të rifreskuara, siç janë ato të miellit , që do të jenë pjesë e këtij dokumenti integral. “Por, duke qenë se jemi ende në fazë tranzitore dhe ende nuk jemi të gatshëm për të adoptuar të gjitha standardet e BE-së, në fushën e sigurisë ushqimore, mund t’i referohemi standardeve të FAO, e cila do të shërbente si referencë tranzitore”, tha Panariti.

Drejtori i Autoritetit Kombëtar të Ushqimit, Dritan Sejko u shpreh se “Krijimi i një kodeksi ushqimor kombëtar është një nga kushtet në fushën e sigurisë ushqimore për integrimin në Bashkimin Europian dhe si i tillë, mbetet një nga prioritetet kryesore të aktorëve dhe faktorëve të të gjithë fushës së sigurisë ushqimore”.
Kryetarja e Bordit të AKU-së,  Renata Kongoli, pasi rikonfirmoi rëndësinë e krijimit të Kodeksit Ushqimor, shprehu idenë se, fillimisht duhet të standardizohen të gjitha prodhimet me origjinë bimore dhe shtazore.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.