Pandemia goditi industrinë e peshkimit – Shitjet u tkurrën me 90 %, konsumi për frymë shumë larg BE-së
Kufizimet e vendosura në vendet fqinje për shkak të pandemisë COVID-19 kanë ndikuar ndjeshëm në shitjet e industrisë së peshkimit në vend, ku është vënë vënë re një tkurrje e biznesit nga 70% në 90% për kompanitë që kanë si klientë të tyre kryesorë përkatësisht supermarketet apo restorantet. Referuar një studimi të hartuar nga Ministria e Bujqësisë dhe GIZ për sektorin e peshkimit, vihet në dukje se rënia më e lartë është reflektuar gjatë periudhës së karantinës për shkak të kufizimit të shpenzimeve dhe mosrekuentimit të restoranteve.
Sipas studimit, trendi i tregut të produkteve të peshkimit tregon se rreth 25-30% e prodhimit tregtohet në tregun vendas, diçka më pak në rajon ku ofrohen çmime më pak tërheqëse se në vendet evropiane dhe pjesa e mbetur është e orientuar drejt eksportit në tregun e BE-së. Tregu vendas mbulohet kryesisht me produkte nga peshkimi artizanal të cilët ia shesin peshkun restoranteve duke marrë shembuj të vendeve si Italia apo Greqia për të furnizuar turistët kryesisht me produktet më të freskëta.
Tregu vendas i produkteve të peshkimit po rritet në mënyrë progresive i mbështetur nga interesi në rritje i konsumatorëve për të integruar më mirë dietën e tyre me peshkun. Megjithatë mesatarja e konsumit për frymë të prodhimeve të detit në Shqipëri është shumë larg mesatares në zonën e BE-së, duke u regjistruar në rreth 5 kg për frymë në vit, nga mbi 20 kg për frymë që konsumojnë qytetarët europianë. Eksportet e peshkut nga Shqipëria u rritën veçanërisht, gjatë periudhës 2015-2018, me 4 herë, me një eksport total në 2018 mbi 16 milionë euro në vlerë. Italia zë rreth dy të tretat e totalit të eksporteve në vëllim, e ndjekur nga Sudedia dhe Spanja .
Shqipëria eksporton çdo vit rreth 2,000 ton peshk të freskët të akuakulturës (veçanërisht levrek dhe krapi) në Bashkimin Europian. Ndërsa fluksi i importit prej 4 mijë ton, është i destinuar kryesisht për të kënaqur kërkesën e tregut vendas me peshk të freskët dhe të sektorit të përpunimit me peshk të freskët, të konservuar, të ngrirë ose gjysmë të përpunuar. Përbvec këtyre produkteve ushqimore, Shqipëria importon edhe rreth 20,000 ton mish peshku.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.