Pandemia, hyjnë në fuqi dënimet – 8 vite burg kush përhap me dashje pandeminë me pasojë vdekje, 2 vite bizneseve që operojnë pa leje
Lehtësimi i masave kufizuese për parandalimin e përhapjes së Pandemisë Covid 19 do të shoqërohet me ashpërsimin e dënimeve dhe penaliteteve për shkeljet e rregullave të sigurisë. Nga dita e sotme kanë hyrë në fuqi ndryshimet në Kodin Penal të miratuara nga Kuvendi javën e shkuar, ku përfshihen edhe dënimet me burgim në rastet e shkeljeve të rënda, veçanërisht kur bëhet fjalë për përhapje të infeksionit me dashje. Vepra penale të dënueshme me burg do të konsiderohen edhe dhuna apo presioni psikologjik ndaj familjarëve apo të afërmve gjatë periudhës së karantinimit.
Thyerja e rregullave në kohë epidemie, kur shkelësi ka marrë më parë masë administrative, dënohet me gjobë ose me burgim deri në gjashtë muaj
Thyerja e rregullave në kohë epidemie, duke ushtruar aktivitet tregtar, dënohet me gjobë ose me burgim deri në dy vjet.
Moszbatimi i urdhrit të dhënë nga organet kompetente për karantinim, dënohet me burgim nga dy deri në tre vjet.
Shkelja e rregullave të karantinës nga personi mbartës i sëmundjes infektive, dënohet me burgim nga dy deri në tre vjet.
Përhapja me dashje e sëmundjes infektive, dënohet me burgim nga dy deri në pesë vjet.
Përhapja e sëmundjes infektive nga pakujdesia, dënohet me gjobë ose me burgim deri në dy vjet.
Përhapja me dashje ose nga pakujdesia e sëmundjes infektive, duke shkaktuar pasoja të rënda për shëndetin ose rrezik për jetën e njerëzve, dënohet me burgim nga tre deri në tetë vjet.
Presioni psikologjik ndaj bashkëshortes, ish-bashkëshortes, përsosnit bashkëjetues apo ish-bashkëjetues, ndaj personit në lidhje apo ish-lidhje intime me autorin e veprës penale, me pasojë cenimin e integritetit fizik, psiko-social dhe ekonomik të tij, dënohet me burgim deri në tre vjet.
Dhuna dhe presioni psikologjik ndaj peronave gjini e afërt (të paralindur, të paslindur, vëllezër, motra, ungjër, emta, nipër, mbesa, fëmijë të vëllezërve dhe të motrave), ose krushqi e afërt (vjehërr, vjehrrë, dhëndër, nuse, kunat/ë, thjeshtri, thjeshtra, njerku e njerka), dënohet me burgim deri në tre vjet.
Dhuna dhe presioni psikologjik i përsëritur ndaj të gjithë personave të rrethit familjar, përfshirë edhe personat në lidhje apo ish-lidhje intime, dënohen nga një deri në pesë vjet burgim.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.