Pandemia, kompanitë sytë nga inovacionet – Sondazhi i Ministrisë së Financave: 64.3% në proces prezantimi të produkteve apo shërbimeve të reja
72.6% e kompanive shqiptare i kushtojnë vëmendje të lartë zhvillimit dhe futjes së Inovacionit në kompanitë e tyre, ndërkohë që gjatë 3 viteve të fundit kanë prezantuar një inovacion produkti, shërbimi apo procesi në aktivitetin e tyre. Të dhënat vijnë përmes një sondazhi me temën Inovacioni si promotor i rritjes ekonomike Sfidat dhe Mundësitë i kryer nga Ministria e Financave me bizneset në vend i zhvilluar në muajt shkurt dhe mars të këtij viti. Ndërkaq, 80% e kompanive të intervistuara janë përgjigjur se e konsiderojnë Inovacionin si një nxitës në rritjen e kompanisë.
Të pyetura Sa i përdorni ju shërbimet Inovatore të ofruara nga Institucionet publike e-albania/e-tax/etj, rezulton se Shërbimet e ofruara nga shteti i përdor gjithmonë 61% e kompanive, kryesisht e-albania dhe e-tax.
Sondazhi zbardh gjithashtu se 86% e kompanive mendojnë se një bashkëpunim me sektorin akademik mbi mundësitë e reja të zhvillimit është mesatarisht ose shumë i nevojshëm.
Ndërkohë që duket se ka qenë Pandemia ajo që i ka nxitur fort kompanitë të hedhin gjithnjë sytë nga inovacioni. 73% e kompanive kanë deklaruar se kanë prezantuar produkte të reja gjatë tre viteve të fundit, ndërsa 64% shërbime të reja. Sondazhi zbardh se aktualisht 64.3% e kompanive kanë në process prezantimi një shërbim apo produkt të ri.
Shqipëria renditet e 83-ta në Indeksin Global të Inovacionit, krahasuar me 131 ekonomi botërore, ndërkohë që sipas raportit të StartupBlink 2020, Shqipëria lëvizi 13 vende më lart në renditje, ndërsa vetëm Tirana me një rritje prej 53 vende krahasuar me 2019.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.