Pandemia rrit sigurimet shëndetësore. Janar-qershor, rritet portofoli i Aksidenteve dhe Shëndetit, ashtu si dhe ai i sigurimit të jetës

Gjashtë muajt e parë të vitit më shumë njerëz kanë siguruar jetën e shëndetin. Të dhënat e sapopublikuara nga Autoriteti I Mbikqyrjes Financiare flasin për rritje të portofolit të Aksidenteve dhe Shëndetit, ashtu si dhe në sigurimet e jetës. Sipas të dhënave zyrtare, të ardhurat nga sigurimet e Aksidenteve dhe Shëndetit, gjatë periudhës janar-qershor 2021, arritën në rreth 625 milionë lekë, afërisht 6 milionë dollarë, duke shënuar një rritje prej 8.41% në krahasim me periudhën janar-qershor 2020. Ndërkohë që primet nga sigurimet e Jetës gjatë periudhës janar-qershor 2021, arritën rreth 678 milionë lekë, ose 38.36% më shumë se në periudhën janar- qershor 2020.

Trend të kundërt kanë shënuar dëmet që kanë paguar kompanitë gjatë gjysmës së parë të këtij viti. Gjatë periudhës janar-qershor 2021, dëmet e paguara bruto në tregun e sigurimeve, arritën në rreth 3,7 miliardë lekë, ose 8.3% më pak se në periudhën janar-qershor 2020, ndikuar kryesisht nga pagesa e konsiderueshme e dëmeve të tërmeteve përgjatë vitit 2020.

Në total, të ardhurat nga primet e shkruara bruto të sigurimit për periudhën janar-qershor 2021 kapën vlerën 8,8 miliardë lekë, afërsisht 88 milionë dollarë, ose 17.53% më shumë se në periudhën janar-qershor 2020. Gjatë periudhës janar-qershor 2021, numri i kontratave të sigurimit të lidhura arriti në 467,511 me një rritje prej 7.48% krahasuar me periudhën janar-qershor 2020.

Tregu vazhdoi të mbetet sërish i orientuar tek sigurimet e Jo-Jetës, të cilat sollën 92.34% të vëllimit të përgjithshëm të primeve, duke i lënë përkatësisht sigurimet e Jetës me 7.65%. Parë nga këndvështrimi i ndarjes së tregut sipas llojit të sigurimit, i detyrueshëm dhe vullnetar, primet e shkruara bruto të sigurimit vullnetar zënë 42.68% dhe primet e shkruara bruto të sigurimit të detyrueshëm zënë 57.32% të totalit të tregut.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.