Paneli ligjor europian: ‘Mund t’i tërheqim kundërshtimet ndaj ndryshimeve të gjykatës së Hungarisë!’
Një panel europian i ekspertëve të së drejtës kushtetuese, raportuan të hënën se mund të heqnin kundërshtimet ndaj sistemit të ri gjyqësor hungarez, nëse Hungaria do të miratonte amendamentet e paraqitura në parlament javën e shkuar, të cilat do të mbronin pavarësinë gjyqësore. Ndryshimet në gjyqësorin e Hungarisë, të propozuara nga partia qeverisëse Fidesz në pushtet, kanë qenë në qendër të një konfrontimi me Bashkimin Evropian, që thotë se disa nga reformat e kryeministrit Viktor Orban kërcënojnë demokracinë dhe sundimin e ligjit.
Fidesz ka thënë se do të pranojë këshillat e Komisionit të Venecias, një panel ekspertësh të së drejtës kushtetuese të ngritur për të këshilluar vendet evropiane si pjesë e trupit të të drejtave të Këshillit të Evropës. Komisioni i Venecias kritikoi ashpër një ligj që Hungaria vitin e kaluar miratoi, për të ngritur një sistem të veçantë të gjykatave administrative, i cili trajtonte rastet në lidhje me biznesin qeveritar. Sipas deklaratës së tyre ditën e hënë, një sërë ndryshimesh të propozuara në përgjigje të kritikave të saj do të zgjidhnin shumë nga problemet.
Sipas ligjit të vitit të kaluar, ministri i drejtësisë do të kishte një liri të gjerë në emërimin e gjyqtarëve dhe mbikëqyrjen e buxheteve të gjykatave që do të marrin përsipër trajtimin e çështjeve që lidhen me prokurimin publik, taksat dhe zgjedhjet. Komisioni tha se sipas ligjit fillestar, “fuqitë shumë të gjëra janë të përqendruara në duart e disa palëve të interesuara dhe nuk ka kontrolle dhe balancime efektive për të kundërshtuar ato pushtete”.
Hungaria vetë i kishte kërkuar Komisionit të Venecias të jepte një opinion mbi legjislacionin dhe tha se ishte i gatshëm të bënte ndryshime në legjislacion nëse kërkohej.Në shtator, Parlamenti Europian votoi për të imponuar sanksione ndaj Hungarisë, për moszbatimin e rregullave të Bashkimit Evropian mbi demokracinë, të drejtat civile dhe korrupsionin, por Hungaria i hodhi poshtë akuzat.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.