Papunësi rekord në Francë – Norma bie nën 9% për herë të parë që prej vitit 2009
Norma e papunësisë në Francë ra nën nivelin e 9% për herë të parë që prej vitit 2009 tregojnë të dhënat më të fundit që i japin kështu të drejtë politikave të ndjekura nga Presidenti Macron por edhe politikave për të ardhmen e tregut të punës.
Norma e papunësisë në ekonominë e dytë më të madhe të Eurozonës ra kështu pranë 8.9% në tremujorin e katërt të vitit të kaluar, nga 9.6% që ishte në tremujorin paraardhës, tregon zyra e statistikave në vend.
Rënia e normës së papunësisë është gjithashtu më e madhja që prej vitit 2008.
Të dhënat japin kështu një sinjal mjaft të fortë se ekonomia franceze më në fund po kthen faqen, pas krizës financiare që goditi të gjithë Europën, dhe Francën në veçanti.
Reforma në tregun e punës ishte iniciativa e parë madhore e Macron në krye të presidencës.
Që pas reformës, ekonomia franceze ka krijuar vende pune me hapin më të shpejtë që prej 2007-ës.
Tashmë në Francë ka 2.5 milionë të papunë. Paçka se norma vijon të mbetet mjaft e lartë, trendi është mjaft optimist.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.