Papunësia globale – Arrin 200 milionë në 2017, ILO bën thirrje për mbështetjen e SME
Më shumë se 200 milionë njerëz në botë janë të papunë, në rritje me 3.4 milionë që prej vitit të kaluar, raporton agjencia e punës e Kombeve të Bashkuara, duke bërë thirrje për politika që mund të nxisin bizneset e vogla e të mesme.
Në përditësimin e ri të raportit “Punësimi Botëror dhe Perspektiva Sociale”, Organizata Ndërkombëtare e Punës paralajmëroi se sipërmarrjet e vogla e të mesme, kanë qenë në stanjacion, me situatën që është përkeqësuar në ekonomitë në zhvillim, ku 1 në 2 persona janë të punësuar në këto firma.
Sipas raportit, sipërmarrjet e sektorit privat përbënin për pjesën më të madhe të punësimit global në vitin 2016, me 2.8 miliardë individë, duke përfaqësuar 87% të totalit të punësimit.
Sektori, që përfshin gjithashtu firmat e vogla e të mesme, përbën për 70% të të gjitha vendeve të punës në disa vende arabe si dhe mbi 50% në Afrikë.
Megjithatë, Organizata Ndërkombëtare e Punës tregoi se këto kompani po hasin vështirësi.
Të dhënat e fundit për mbi 130 vende, tregojnë se bizneset e vogla e të mesme kanë rritur punësimin me norma më të larta se ato të mëdha përpara krizës globale financiare.
Megjithatë, pas vitit 2009, krijimi i vendeve të punës te kjo kategori ka “ngecur” dhe ILO i bën thirrje qeverive që të ndërhyjnë për të përmbysur këtë trend.
Zyrtarët e Organizatës thonë se duhen politika për të promovuar këto sipërmarrje si dhe një mjedis më të mirë të biznesit për të gjithë firmat, përfshirë aksesin për financim te bizneset e reja.
Një tjetër aspekt i nënvizuar në raport është mënyra se si kushtet e punës mund të luajnë një rol të rëndësishëm në zhvillimin e qëndrueshëm, duke treguar se ofrimi i trajnimit të stafit mund të sjellë një rritje me 14% të pagave dhe 20% të produktivitetit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.