Papunësia në Gjermani – Bie në nivel rekord për Shtatorin, konsumi ngadalësohet
Norma e papunësisë në Gjermani ra në një nivel rekord të ulët prej 5.6% në muajin Shtator dhe numri i personave të papunësuar ra më shumë se sa pritej. Të dhënat tregojnë fuqinë e tregut të punës në ekonominë më të madhe të Europës.
Norma e papunësisë në 5.6% tregon nivelin më të ulët që prej riunifikimit në vitin 1990, pas 5.7% që rezultoi në Gusht, raporton Zyra Federale e Statistikave. Ekonomistët e prisnin normën të pandryshuar në 5.7%.
Numri total i të papunëve ra me 23 mijë në 2.506 milionë duke u përshtatur për efektet sezonalë. Të dhëna të tjera nga Zyra Federale e Statistikave treguan se shitjet me pakicë ranë papritmas në muajin Gusht, në një ekonomi që ka për nxitës kryesor shpenzimet konsumatore.
Sipas treguesit të luhatur, shitjet me pakicë në ekonominë më të madhe të Europës ranë me 0.4% gjatë muajit në terma realë. Ekonomistët prisnin një rritje prej 0.5%.
Me bazë vjetore, shitjet u rritën me 2.8%, duke mbetur të pandryshuara nga norma e muajit të kaluar, megjithatë poshtë projeksioneve prej 3.2%.
Shpenzimet konsumatore kanë zënë vendin e eksporteve për nxitësin kryesor të ekonomisë. Perspektiva për ekonominë gjermane është pozitive, me institucionet kryesore që kanë rritur projeksionet në 1.9% këtë vit dhe 2% në tjetrin.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.