Papunësia në Japoni – Shënon 2.4% gjatë Janarit, niveli më i ulët në 25 vite
Norma e papunësisë në Japoni shënoi nivelin më të ulët në 25 vite gjatë Janarit dhe disponueshmëria e vendeve të punës qëndroi në nivelin më të lartë në 2 dekada. Të dhënat japin inkurajim për politikëbërësit, ndërkohë që fuqizimi i ekonomisë së tretë më të madhe në botë do të bëjë që firmat të rrisin pagat duke shkaktuar nxitje të inflacionit.
Të dhëna të tjera këtë javë treguan se indeksi bazë i çmimeve të konsumit në Tokjo, një tregues mbi trendin kombëtar të çmimeve, u përshpejtua në 0.9% në Shkurt nga 0.7% që ishte në Janar. Ndërkohë që inflacioni qëndron ende larg objektivit të Bankës së Japonisë prej 2%, të dhënat e fundit përmirësojnë perspektivën pasi tregu i fortë i punës pritet të bëjë që firmat të rrisin çmimet.
Norma e papunësisë e përshtatur ndaj efekteve sezonalë ra në 2.4% gjatë Janarit, nga 2.7% që ishte në Dhjetor. Kjo është edhe më e ulëta që prej Prillit 1994, ku ekonomia e Japonisë ndodhej ende në krizën që erdhi prej flluskës në çmimet e aksioneve. Raporti i vendeve të punës ndaj aplikimeve qëndroi në 1.59, shifër e pandryshuar nga muaji i kaluar dhe niveli më i lartë që prej Janarit 1974.
Rritja e inflacionit në Tokjo erdhi prej rritjes së çmimeve në hotele dhe paketat e udhëtimeve, gjë që reflekton kërkesën e vizitorëve kinezë ndaj qytetit dhe udhëtimet e japonezëve në Korenë e Jugut gjatë lojërave Olimpike dimërore.
Ekonomia e tretë më e madhe në botë u rrit me 0.5% në tremujorin e fundit 2017 dhe tregoi rritjen më të gjatë në kohë që prej viteve 80.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.