Papunësia në Kinë – Norma zyrtare në 3.95%, qëndrojnë sfida përpara
Norma e papunësisë në Kinë ka shënuar nivelin më të ulët në shumë vite, në 3.95% në fund të muajit Shtator, megjithatë punësimi ka ende sfida përpara ndërkohë që qeveria ndërmerr reformat strukturore.
Ministria e Burimeve Njerëzore dhe Sigurisë Sociale deklaroi se 10.97 milionë vende të reja pune janë krijuar në Kinë nga Janari në Shtator të këtij viti, një rritje me 300,000 krahasuar me vitin e mëparshëm. Shifra tregon për arritjen e objektivit për vitin e plotë.
Sipas ministrisë, norma e ulët e papunësisë në një kohë të ngadalësimit ekonomik vjen prej sipërmarrjeve të reja në internet. Nga viti 2015 e deri në fund të dekadës, çdo rritje me 1% në Produktin e Brendshëm Bruto do të jetë thuajse e barabartë me 1.8 milionë vende të reja pune, deklaron ministria.
Kryeministri Li Keqiang ka thënë më herët gjatë vitit se Kina shtoi 13.1 milionë vende të reja pune në 2016-ën dhe se synon të shtojë 11 milionë për këtë vit, ndërkohë që mban normën e papunësisë poshtë 4.5%-shit.
Shifra zyrtare mbi papunësinë e Kinës ka mbetur përgjithësisht e qëndrueshme, ndërkohë që rritja ekonomike ka rënë në nivelin më të ulët në 26 vite dhe ndërsa Qeveria përpiqet të ulë mbikapacitetin industrial.
Megjithatë, shumë analistë thonë se shifra zyrtare në Kinë është një tregues i pabesueshëm, pasi mat vetëm punësimin në zonat urbane dhe nuk merr parasysh miliona emigrantë, që shërbejnë si themeli i fuqisë punëtore të vendit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.