Para’ për të ikur nga puna – Francë, ligji i ri do t`i kushtojë shtetit 180 mln euro

Franca planifikon që të rrisë përfitimet e papunësisë për ata njerëz që dorëhiqen nga puna e tyre. Lëvizja e fundit e Emmanuel Macron  do t`i kushtojë arkave të shtetit plot 180 milionë euro deklaroi ministri i punës në vend, Muriel Penicaud. Kjo lëvizje vjen në kuadër të reformës së gjerë për të drejtat dhe sigurinë në punë.

Qeveria nuk do të ndërmarrë një urdhër ekzekutiv për ta kthyer vendimin në ligj, pro do të respektojë parlamentin, në mënyrë që të shmangen tensionet me sindikatat. Reforma në fjalë është pjesë e një pakete më të gjerë që ka për synim të ulë papunësinë mjaft të lartë në vend, në rreth 9%. Franca është ekonomia e dytë më e madhe e Eurozonës dhe një papunësi në 9% është mjaft domethënëse për vendin.

Deri më tani, reforma ka dhënë sinjalet e para, pasi për herë të parë ndër vite, papunësia ka rënë nën 9%. Rritja e përfitimeve për ata që dorëhiqen nga puna ka për qëllim që të nxisë njerëzit që të fillojnë një biznes dhe jo të lidhen për shumë kohë me një vend të caktuar pune. Ky ishte një premtim i Macron gjatë fushatës presidenciale, që duket se shumë shpejt do të kthehet në realitet.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.