“Paradoksi” lezhjan – Punojnë dhe paguhen më pak, por konsumojnë më shumë
Një i punësuar në Tiranë merr mesatarisht 57 500 lekë në muaj, ndërsa në Shkodër paguhet mesatarisht 39 mijë lekë. Statistikat vjetore rajonale të Instat evidentojnë hendekun e ndjeshëm të pagave mes qarqeve të ndryshme të vendit. paga mesatare në Shqipëri për vitin e kaluar ishte rreth 50 600 lekë ose rreth 410 euro në muaj. Vetëm në Tiranë pagat janë më të larta se mesatarja kombëtare, me rreth 14% më shumë, ndërsa në të gjithë pjesën tjetër të vendit pagat janë më të ulëta se kjo mesatare.
Niveli më të ulët të pagave në vend e kanë qarqet e Shkodrës dhe Lezhës, ku një i punësuar paguhet mesatarisht 22% më pak se mesatarja kombëtare. Në veçanti, qarku i Lezhës ndërthur një pagë mesatare të ulët me një shkallë papunësie mjaft të lartë, në kufijtë e 20% dhe me shkallën më të ulët të punësimit në vend, në rreth 45%. Por, po të kryqëzojmë këto shifra me të dhënat e konsumit të familjeve, Lezha ka një konsum mujor në nivelin e rreth 70 mijë lekëve, duke lënë pas shumë qarqe të tjera me papunësi më të ulët dhe pagë mesatare më të lartë, siç janë Gjirokastra, Vlora, Elbasani, Kukësi apo Dibra. Kjo tregon se statistikat e tregut të punës dhe pagave jo gjithmonë arrijnë të shpjegojnë nivelin e konsumit dhe të mirëqenies. Diferencat mund të shpjegohen me të ardhurat nga burime të tjera kryesisht nga remitancat, por edhe me ekonominë e zezë dhe aktivitetet e jashtëligjshme.
Niveli i të ardhurave nga pagat në një masë të madhe lidhet edhe me peshën e sektorit publik në punësim. Kështu, po të shohim të dhënat në nivel të bashkive të veçanta, rezulton se paga mesatare në Tropojë, Pukë dhe Malësi të Madhe është më e lartë se në Korçë, në Vlorë dhe në Elbasan.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.