Paraja, jashtë tregjeve në zhvillim – Investitorët tërheqin $5.5 mld që kur Fed rriti interesat javën e kaluar

Investitorët e huaj kanë nxjerrë 5.5 miliardë dollarë nga tregjet në zhvillim, që kur Rezerva Federale në Shtetet e Bashkuara rriti normën bazë të interesit javën e kaluar, sipas të dhënave të Institutit të Financave Ndërkombëtare. Fluksi dalës nga aksionet në tregjet në zhvillim arriti në një total prej 4.2 miliardë dollarë, që prej takimit të Rezervës Federale, ndërsa 1.3 miliardë doli nga titujt e borxhit. Investitorët e huaj kanë shitur më shumë se 320 milionë dollarë aksione kineze ditën e Martë, që ka qenë dita e parë e shitjes neto nga investitorët e huaj që prej datës 4 Maj.

Kina ka mbetur e qëndrueshme gjatë daljes së kapitalit nga tregjet në zhvillim, megjithatë shqetësimet mbi ndikimin e tarifave nga administrata e Trump, kanë sjellë përmbysjen e fluksit, sipas IIF.  Dalja e kapitalit nga tregjet në zhvillim në javën e kaluar, është përqendruar në Azi, duke vënë në dukje rritjet e shqetësimeve mbi konfliktin tregtar Kinë-SHBA.

Ekonomitë e tregjeve në zhvillim kanë qenë në mbikëqyrej që prej mesit të muajit Prill, ndërkohë që pritshmëritë për norma më të larta të interesit sollën daljen e parasë. Rezerva Federale rriti të Mërkurën e kaluar normën e interesit me 25 pikë bazë, në 1.75% – 2% dhe hodhi poshtë udhëzimin për të mbajtur interesat e ulëta për të stimuluar ekonominë.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.