Paralajmërim për bankat britanike – BQE: Po u mbaron koha për të aplikuar për licencë në BE

Banka Qendrore Europiane bën të ditur se huadhënësve në Britani që kërkojnë të mbajnë aksesin në Eurozonë pas Brexit, po u mbaron koha dhe se nuk duhet të mbështeten plotësisht në marrëveshjen mbi periudhën e tranzicionit.

Pas daljes së Britanisë në Mars të 2019-ës, bankat pritet të humbasin aksesin ndaj tregut të përbashkët dhe negociatat për një periudhë tranzicioni deri më tani kanë qenë të ngadalta, duke shtuar dyshimet.

Sipas zyrtarëve të BQE, nuk është e sigurt nëse kjo periudhë tranzicioni do të ndodhë dhe se bankat duhet të jenë të gatshme për Brexit.

Institucioni në Frankfurt bën të ditur se çdo bankë që kërkon të zhvendoset nga Britania në Eurozonë duhet ta kishte dorëzuar deri më tani aplikimin për licencë dhe se afati i fundit për ta bërë këtë është fundi i tremujorit të dytë të këtij viti.

Tetë huadhënës kanë ndërmarrë hapat formale për të marrë licencën dhe katër të tjerë po planifikojnë të zgjerojnë bindshëm aktivitetet në Eurozonë.

Megjithatë, sipas zyrtarëve të njësisë së mbikëqyrjes të Bankës Qendrore Europiane,  institucioni mund t’i japë kohë shtesë huadhënësve për të paraqitur planet e tyre të zhvendosjes, nëse kanë plane të besueshme dhe me cilësi të lartë.

“Ne presim që këto banka të jenë të afta të ofrojnë të dhëna të plota dhe të sakta në financat e tyre,  strategjitë e mbrojtjes dhe ekspozimet brenda grupit”, deklaron BQE.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.