Paralajmërimi i AMF – Ruhuni nga investimi në monedhat virtuale
Autoriteti i Mbikëqyrjes Financiare i bën thirrje publikut shqiptar të ruhet nga investimi në monedhat virtuale. Në një njoftim zyrtar, AMF ka kërkuar nga investitorët kujdes të veçantë lidhur me investimet që po promovohen kohët e fundit në emetimet e Monedhave Virtuale me Ofertë Fillestare.
Kjo formë investimi ofrohet kryesisht nga biznese të reja apo start up, që tentojnë përmes emetimit të këtyre monedhave virtuale të financojnë projektet e tyre. AMF bën të ditur se emetimi i monedhave virtuale me ofertë fillestare nuk është subjekt i ndonjë forme rregullimi, ndaj investitori nuk gëzon të njëjtin nivel mbrojtjeje, sikurse në rastin e produkteve financiare të ofruara nga subjekte të licencuara dhe të mbikëqyrura.
Sipas AMF, investimi në këto monedha bart rreziqe të shumta.
Investimi në një monedhë virtuale me ofertë fillestare, ICO mund të rezultojë si investim në një skemë mashtruese dhe si e tillë ju mund të humbisni të gjitha paratë; firmat që emetojnë Monedha Virtuale me Oferte Fillestare janë kryesisht biznese të reja dhe të tilla mund të rezultojnë të pasuksesshme; investimi ka rrezik të lartë likuiditeti, pasi investitorët që blejnë monedhën mund të mos kenë mundësi ta shesin atë në rast se do të kenë nevojë për para; emetimet e monedhave virtuale me ofertë fillestare mund të shërbejnë si skema për të pastruar paratë dhe si të tilla investitorët mund të përballen me rrezik të konsiderueshëm ligjor; investimi lidhet me një mungesë transparence si rezultat i një informacioni të pamjaftueshëm dhe të pa audituar nga shoqëritë e auditimit; tregu i monedhave virtuale me ofertë fillestare mund të jetë i manipuluar, duke qenë subjekt i përhapjes së lajmeve të rreme me qëllim për të ndikuar çmimin e monedhës virtuale.
Autoriteti i Mbikëqyrjes Financiare informon investitorët se nuk ka licencuar asnjë agjent për të promovuar aktivitete të tilla në Republikën e Shqipërisë.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.