Paralajmërimi i IGJEUM: Moti i keq, parashikohen përmbytje në të gjithë territorin e Shqipërisë. Lumenjtë që do të kenë prurje maksimale
Instituti i Gjeoshkencave ka njoftuar se përgjatë datave 6 – 11 janar priten reshje shumë intensive, pothuajse në të gjithë territorin e Shqipërisë.
“Nga llogaritjet hidrologjike të IGJEUM, këto reshje do të sjellin rritje të rrezikshme të prurjeve në lumenjtë e mëdhenj dhe të mesëm Drin-Buna, Mat, Ishëm, Erzen, Shkumbin, Seman dhe Vjosë.
Përmbytje mund të shkaktohen nga lumi Drin-Buna dhe Liqeni i Shkodrës me prurjet maksimale të cilat parashikohen të arrijnë zonat e rrezikuara në datën 12 Janar 2021. Lumenjtë Mat, Ishëm, Erzen dhe Shkumbin do i arrijnë prurjet maksimale në fundin e datës 8 dhe 9 Janar 2021.
Lumenjtë Seman dhe Vjosa parashikohen të rrezikshëm por me probleme më të vogla lokale të përmbytjeve” shkruan IGJEUM në njoftimin e bërë.
Ndër të tjera, Instituti i Gjeoshkencave shkruan se shkalla e rrezikut nga përmbytjet lumore do të varet edhe nga sasia e shkrirjes së dëborës, si pasojë e rritjes së temperaturave. Po ashtu, IGJEUM njofton se përmbytje urbane dhe rrëshqitje të dherave mund të ndodhin në pothuajse të gjitha qarqet.
“Sot pasdite (e mërkurë, dt. 06) dhe nesër (e enjte, dt. 07) priten reshje shumë intensive në qarqet Shkodër, Kukës, Dibër, Lezhë, Durrës dhe Tiranë. Në qarqet e tjerë priten reshje intensive, ndërsa në qarqet Elbasan, Vlorë dhe Gjirokastër deri lokalisht shumë intensive” shkruan IGJEUM.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.