Paralajmërimi për administratën, Koçiu: Fushatë jashtë institucioneve dhe orarit të punës
Pjesëmarrja e punonjësve të administratës publike në fushata zgjedhore po zë një pjesë të madhe të debatit publik. Por edhe pse ishte paralajmëruar nga kryeministri, tashmë paralajmërimi i radhës vjen DAP për mospërfshirjen e administratës publike në fushatën zgjedhore. Drejtore e Departamentit të Administratës Publike, Albana Koçiu, deklaroi se çdo punonjës e ka të ndaluar të përfshihet në fushatë brenda perimetrit të institucionit dhe në orarin e punës dhe për këtë do ketë sanksione.
“Ndalohet kategorikisht përdorimi i mjeteve, fondeve materiale të ndryshme pronë e administratës publike si dhe burimeve njerëzore të institucioneve të administratës publike të çdo niveli. Përcaktohet qartë ndalimi i fushatës zgjedhore në institucione publike. Ndalimi i përdorimit të detyruar të administratës së institucionit për veprimtari të fushatës zgjedhore brenda orarit të punës, si dhe i nxënësve të sistemit shkollor parauniversitar brenda orarit mësimor”, deklaroi Koçiu.
Sipas Koçiut, pas orarit zyrtar të punës dhe jashtë institucioneve, punonjësit e administratës publike janë të lirë të mbështesin cilën parti të duan.
“Të drejtat politike për punonjësit e administratës nisin pas orarit zyrtar dhe jashtë perimetrit të institucioneve të administratës. Kushdo ka të drejtë të plotë e të pacenueshme të angazhohet me cilëndo parti politike. Mësuesit janë të lirë, nxënësit janë të lirë por jashtë institucionit dhe orarit zyrtar”.
Koçiu tha se me vendim qeverie pritet të ngrihet një strukture e posaçme monitorimi për administratën gjatë kësaj periudhe.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.