Paralajmërohet plan i ri ekonomik për Shqipërinë. Paga minimale rritet në 30 mijë lekë
Paga minimale në Shqipëri do të bëhet 30 mijë lekë. Kjo u paralajmëruar nga kryeministri Edi Rama në Kongresin Zgjedhor 2020 që u mbajt ditën e shtune në Tiranë. Kryeministri paralajmëroi se këtë pranverë do të bëhet publik plani i ri ekonomik, që parashikon një valë rë dytë reformash ekonomike.
Sa i përket pagës minimale, kryeministri tha se nga 1 janari i vitit 2021 ajo do të rritet në 30 mijë lekë.
“Ne kemi krijuar bazën për një zhvillim të ri të ekonomisë, për të pasur një volum të konsiderueshëm investimesh të huaja. Për një rritje të punësimit real dhe jo vetëm të punësimit real, por dhe për një shtytje më lart të nivelit të pagave për ata që punojnë në sektorin privat dhe patjetër, duke filluar nga rritja e pagës minimale. Nuk e bënim dot këtë dje dhe besojeni, nëse tërmeti i 26 nëntorit, larg qoftë, do kishte rënë në 26 nëntor të viti 2013, jo rindërtim, por ne do ishim futur në gropë bashkë me ata që fatkeqësisht u ndanë nga jeta si shtet dhe si ekonomi, si shoqëri e si perspektivë.
Por pikërisht, pse ne u gjendëm përpara një tërmeti në nëntorin e vitit të shkuar, sot jemi në gjendje ta përballojmë jo vetëm pasojën tragjike të atij tërmeti, por sot jemi në gjendje të flasim për një kapërcim të ri ekonomik, që do të jetë fizionomia e mandatit tonë të tretë. Për këtë arsye, detyra jonë është që 2020-n ta kthejmë në një moment historik force të shembullit qeverisës, duke e provuar për njerëzit se aty ku të tjerët panë dritëshkurtësisht fundin tonë për shkak të tërmetit, aty është burimi i forcës sonë, për të shkuar përtej tërmetit e për ta çuar vendin në një nivel të ri zhvillimi ekonomik dhe social.
Këtë pranverë, ne do lancojmë planin e ri ekonomik, do të nisim valën e dytë të reformave e sot po ju them që nga 1 janari i vitit 2021, paga minimale do të jetë 300 mijë lekë. Është vetëm hapi i parë. Nuk do të ketë më e nuk do lejojmë më në Shqipëri, njerëz që punësohen e marrin më pak se 300 mijë lekë” tha kryeministri në fjalën e tij.
Paga minimale aktualisht është 26 mijë lekë. Sindikatat në vend kanë propozuar që niveli të ngrihet në 36 mijë lekë. Kjo kërkesë u bë në fund të vitit të kaluar ndërsa diskutohej buxheti i këtij viti. Sipas sindikatave, rritja e pagës minimale do të bënte të mundur qendrueshmërinë e tregut të punës dhe stabilitetin e skemës së sigurimeve shoqërore dhe do të frenonte emigracionin apo azilkërkimin në vendet e BE-së.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.