Paralajmëron BIS – Bankat Qendrore të sigurohen mbi efektshmërinë e tkurrjes monetare

Bankat më të mëdha qendrore në botë  duhet të sigurohen se rritja graduale e normave të interesit do të jetë efektive, në mënyrë që të stabilizohen tregjet financiar, deklaron Banka e Rregullimeve Ndërkombëtare në Bazel.

Institucioni dha paralajmërimin në një kohë të optimizmit të investitorëve prej rimëkëmbjes së ekonomisë globale, inflacionit të ngadaltë dhe mbivlerësimin në tregjet e kapitaleve.

Nivelet e mëdha të borxhit zbulojnë cënueshmëritë në sistemin financiar dhe rritja gjigante e çmimit të aktiveve këtë vit ka shtuar alarmin te institucioni në Zvicër.

“Nivelet e mëdha të borxhit, në valutë të huaj dhe vendase, po vazhdojnë të rriten. Të njëjtën gjë po bëjnë edhe çmimet e aktiveve”, deklaroi kreu i departamentit monetar dhe ekonomik të institucionit, Claudio Borio.

Sipas tij, sa më gjatë të vazhdojë periudha e pranimit të rrezikut, aq më shumë do të ekspozohen bilancet ndaj rreziqeve. Qetësia në terma afat-shkurtër vjen me koston e trazirave të mundshme në afat-gjatë.

Banka e Rregullimeve Ndërkombëtare vuri theksin edhe te yield-et e obligacioneve, që kanë qëndruar në nivele të ulëta pavarësisht tkurrjes së bilancit nga Rezerva Federale dhe përgatitjes për përfundimin e stimujve nga Banka Qendrore Europiane. Ritmi i tkurrjes monetare nga Rezerva Federale pritet të jetë më i ngadalti në histori.

“Në një kohë që gradualizmi dhe parashikueshmëria janë kthyer në normalitet, shqetësimet mbi tkurrjen monetare efektive ka gjasa të shtohen”, deklaron institucioni në Bazel.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.