Paralajmëron Ifo – “Kthimi i Eurozonës në një ‘union transfertash’ është i rrezikshëm”
Transformimi i Eurozonës në një “union të transfertave”, ku vendeve anëtare të pasura i kërkohet që të mbështesin financiarisht anëtarët më të varfër, do të sillte fundin e bllokut të valutës së përbashkët, deklaron kreu i institutit gjerman për ekonominë Ifo, Clemens Fuest.
“Një nëngrup në parlamentin Europian për Eurozonën, buxheti i eurozonës dhe ministri i përbashkët i financave për bllokun, të gjitha këto propozime, nuk do të zgjidhnin problemet e bllokut të valutës së përbashkët, përkundrazi do t’i shtonin”, tha kreu i institutit Ifo.
Sipas tij, propozimet për zgjerimin e transfertave në Eurozonë janë të rrezikshme. “Nëse shohim rastin e Katalonjës, krijojmë një ide se çfarë do t’i ndodhë Eurozonës nëse unioni i valutës së përbashkët kthehet në një union transfertash: vendet e vogla dhe të pasura do të largohen”, shtoi ai.
Paralajmërimet e tij vijnë pas takimit të ministrave të financave në Luksemburg, ku u diskutua mbi transformimin e rolit të Mekanizmit Europian të Stabilitetit, si dhe mbi ide të tjera si caktimin e një buxheti për Eurozonën, një ministër financash për bllokun dhe një nëngrup për Eurozonën në Parlamentin Europian.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.