Parandalimi i kancerit të qafës së mitrës/ Nga viti 2023, vaksina pjesë Kalendarit Kombëtar, Manastirliu: Redukton shpenzimet e familjeve
Vaksina kundër human papilonavirusit, që shkakton kancerin e qafës së mitrës do të përfshihet në kalendarin e kombëtar të vaksinimit”. Në Javën Botërore të Imunizimit, ministrja e Shëndetësisë dhe Mbrojtjen Sociale Ogerta Manastirliu tha se aplikimi do të nisë në vitin 2023, duke reduktuar me 99% rrezikun për t’u prekur nga kjo sëmundje.
“Përfshirja e vaksinës HPV tek vajzat do të na japë një garanci rreth 99 % që do të kemi një reduktim të riskut ndaj kancerit të qafës së mitrës. Studimet kanë treguar që edhe efektiviteti vetëm me një dozë e vaksinës kundër human papilomavirusit redukton deri në 89% rrezikshmërinë ndaj kancerit të qafës së mitrës. Sot ka familje që e blejnë këtë vaksinë, nga 2023 ky do të jetë një investim i qeverisë shqiptare, i Ministrisë së Shëndetësisë dhe Mbrojtjes Sociale për mbrojtjen dhe shëndetin e vajzave dhe grave në Shqipëri”, tha ajo.
Shefja e Departamentit të Epidemiologjisë dhe Sëmundjeve Infektive në ISHP, prof. Silva Bino, e ka konsideruar këtë një investim në shëndet, duke theksuar se kjo vaksinë është e sigurt.
“Është vaksinë tepër e rëndësishme, e cila parandalon infektimin nga ky virus. Duke kryer këtë vaksinë vajzat të cilat janë të vaksinuara nuk mund të infektohen me ato viruse që janë shkaktarët kryesorë të kancerit të qafës së mitrës. Është një vaksinë e sigurt për të cilën janë kryer një sërë studimesh dhe vlerësimesh, e aplikuar në të gjitha vendet e BE dhe shumë vende të tjera të globit”, u shpreh ajo.
Kjo do të jetë vaksina e 14-të në Kalendarin Kombëtar të Vaksinimit. Ajo aplikohet tek vajzat në moshën e para-adoleshencës dhe është jetë shpëtuese pasi parandalon kancerin e qafës së mitrës.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.