Paratë e krimit në ekonomi, De Raho: Po investohen përmes korrupsionit në biznese të ligjshme

Program i vënies nën mbikëqyrje të posaçme i krerëve të krimit të organizuar për të shkëputur lidhjet e tyre me botën e jashtme ka sjellë në Shqipëri Prokurorin e Antimafias italiane Federico Cafiero De Raho.

Në një aktivitet të organizuar nga Ministria e Drejtësisë, ku morën pjesë përfaqësues nga agjencitë ligjzbatuese në vend, u analizua mënyra si paratë e krimit të prodhuara brenda e jashtë kufijve riciklohen në formën e investimeve me ndihmën e korrupsionit.

Ministrja e Drejtësisë Etilda Gjonaj theksoi se janë rreth 270 persona me rrezikshmëri të lartë që do t’i nënshtrohen këtij regjimi të posaçëm.

Prokurori i Antimafias italiane Federico Cafiero De Raho tha se izolimi i eksponentëve të krimit nga bota e jashtme merr rëndësi të dorës së parë për shkak të sasive shumë të mëdha të parave që zotërojnë organizatat kriminale shqiptare si dhe niveleve të larta të sofistikimit që ato kanë arritur.

Kanalizimi i parave të krimit në ekonominë e ligjshme përmes korrupsionit u nënvizua edhe më herët gjatë takimit, Ambasadori i Bashkimit Evropian Luigi Soreca.

Ai tha se vijimi i luftës kundër korrupsionit dhe krimit të organizuar do të jetë faktor vendimtar në çeljen e negociatave për anëtarësim me Bashkimin Evropian në Qershor.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.