Parisi në festë – Blerësit dynden nëpër dyqane, lodrat janë produkti numër një
Në Paris, dritat janë ndezur prej kohësh tashmë, ndërkohë që blerësit janë dyndur në rrugët kryesore të kryeqytetit francez për të bërë blerjet e periudhës së para festave. Në bulevardin Haussmann, që është edhe një prej rrugëve më të famshme për të bërë pazar në qytet, situata duket mjaft festive.
Me një sipërfaqe prej 2200 metër katrorë dhe me një kapacitet malli prej 500 mijë lodrash për fëmijë, JoueClub pretendon të jetë dyqani më i madh në qytet për lodra, ndërkohë që deklaron se 35% të xhiros vjetore e bën pikërisht gjatë muajit Dhjetor.
Lodrat për fëmijë janë edhe simbolika e fundvitit. Gjatë ditëve të fundit të dhjetorit në pjesën dërrmuese të dyqaneve, stafi dyfishohet për shkak të atij që konsiderohet si paniku i para festave mes blerësve.
Pjesë e rëndësishme dhe thelbësore e këtyre festave është edhe bamirësia, dhe këtë gjë e shfrytëzojnë më së miri vullnetarët e shoqatave të ndryshme të bamirësisë që mbledhin fonde për ti shpërndarë më pas në formë vaktesh apo lodrash te të pastrehët dhe fëmijët e emigrantëve.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.