Parkimi pa pagesë në Tiranë – Lidhet kontrata 10 milionë lekë për kartën e rezidentit
Agjencia Tirana Parking ka shpallur kompaninë fituese, që do të prodhojë kartat e rezidentit, duke i hapur rrugën parkimit pa pagesë në të gjitha zonat e administrimit në kryeqytet.
Vlera totale e kontratës arrin në 10 milionë lekë, ndërkohë që me nënshkrimin e saj i jepet fund pilotimit të projektit në vetëm disa zona. Kompania fituese do të duhet të emetojë 4 modele të ndryshme kartash, sipas zonave përkatëse ku ato do të përdoren dhe sipas kritereve të paracaktuara gjatë shpalljes së njoftimit në Agjencinë e Prokurimit Publik.
Me kartën e rezidentit mund të pajisen jo vetëm pronarët e banesave, por edhe qiramarrësit, që jetojnë për një kohë të gjatë, ndërkohë që ajo është e vlefshme vetëm për zonën e administrimit ku jetojnë dhe jo për 3 zonat e tjera.
Kjo pullë identifikuese është “e personalizuar” dhe do të duhet të vendoset brenda xhamit, në pjesën e përparme të automjetit, ku shënohet targa e automjetit, afati i vlefshmërisë, numri serial, si dhe numri i zonës.
Për t’u pajisur me këtë kartë, personat e interesuar duhet të paraqiten pranë drejtorisë së Përgjithshme të Agjencisë Tirana Parking, ku duhet të dorëzojnë dokumentet që vërtetojnë se qytetari është rezident. Vlefshmëria e saj është 12 muaj, ndërkohë që me përfundimin e këtij afati karta duhet rinovuar.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.