Parkingu tjetër nëntokësor, Veliaj: Rikonceptohet edhe këndi ekzistues i lojërave për fëmijë
Kryeqytetit do t’i shtohet edhe parkingu i 4 nëntokësor, i cili do të jetë në rrugën e Elbasanit, një aks me fluks të lartë automjetesh dhe shumë pranë institucioneve më të rëndësishme shtetërore.
Kryebashkiaku Erion Veliaj, inspektoi punimet, ku theksoi se Tirana po merr pamjen e një Europe të vogël.
“Para tre vitesh, ndërtimi i një parkingu nëntokësor në kryeqytet ishte diçka e paimagjinueshme. Por, sot në Tiranë, përveç dy parkingjeve te sheshi “Skënderbej” dhe në hyrje të Bulevardit të Ri, të cilët kanë zgjidhur një pjesë të mirë të parkingut në qendër, po ndërtohen edhe dy të tjerë: ai te stadiumi dhe një tjetër në Rr. e “Elbasanit”. Kryebashkiaku Erion Veliaj inspektoi punimet që po kryhen tek ky i fundit, një parking publik me dy kate nën tokë dhe 145 vende. Kurse, mbi sipërfaqen e tij është rikonceptuar këndi ekzistues i lojërave për fëmijë”, tha Veliaj.
Parkimi publik është projektuar me 2 kate nëntokë dhe ofron 145 vendparkime në total, plus 2 vende parkimi për PAK-un. Lëvizja në parkim realizohet me anë të shkallëve dhe një ashensor.
Parkimi përmban sistem ventilimi dhe sistem të mbrojtjes kundër zjarrit, ndërkohë që është i pajisur me sistemin e ndriçimit emergjent dhe me tualete.
Kreu i bashkisë nënvizoi se në përfundim të punimeve, do të zgjidhet përfundimisht edhe shqetësimi për parkim për automjetet në kryeqytet.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.