Parlamenti bllokon përsëri Brexit-Detyron Johnson që t’i kërkojë BE shtyrje tjetër të afatit
Britania ka kërkuar një tjetër shtyrje të Brexit përtej datës 31 Tetor, pasi parlamenti vonoi votimin e marrëveshjes së negociuar nga Kryeministri Boris Johnson.
Presidenti i Këshillit Europian, Donald Tusk, tha se ka marrë një letër ku kërkohet shtyrja e afatit dhe shtoi se do të nisë konsultat me liderët e shteteve për mënyrën se si t’i përgjigjet kësaj kërkese. Është hera e tretë që Britania i kërkon Bashkimit Europian për të shtyrë afatin e Brexit.
Megjithatë, Johnson nuk e ka firmosur letrën dhe nëpërmjet një shkrese tjetër, ai i ka shpjeguar Donald Tusk se personalisht e kundërshton këtë shtyrje të afatit.
“E kam bërë të qartë që kur mora detyrën si Kryeministër se shtyrja e Brexit do të cënojë interesat e Mbretërisë së Bashkuar dhe partnerëve europianë dhe marrëdhënien mes nesh”, shkroi Johnson. Pavarësisht se Johnson e kundërshton këtë shtyrje, Qeveria e Britanisë është detyruar që ta kërkojë, pasi deputetët votuan për të vonuar miratimin e marrëveshjes së Johnson.
Parlamenti votoi me 322 pro dhe 306 kundër, për amendamentin, që aktivizon ligjin e njohur si “Benn Act”, që detyron Downing Street t’i kërkojë Brukselit shtyrjen e Brexit. Johnson shkroi se i takon Bashkimit Europian tashmë për të vendosur nëse do të miratojnë kërkesën.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.