Parlamenti miraton shefen e BQE – Lagarde, femra e parë në institucionin financiar më të fuqishëm në BE
Parlamenti Europian miratoi Christine Lagarde si presidenten e ardhshme të Bankës Qendrore Europiane, duke e bërë atë gruan e parë që mban postin. Deputetët votuan me 394 vota pro, 206 kundër dhe 49 abstenime, gjatë seancës plenare në Strasburg.
Deputeti i qendrës së djathtë, Ludek Niedermayer, tha se Christine Lagardë përbën një zgjedhje perfekte dhe është pozicionuar mirë për të theksuar rëndësinë e politikave të tjera ekonomike dhe jo vetëm ato monetare.
Një negociatore mendjemprehtë që ka drejtuar Fondin Monetar Ndërkombëtar por që ka pak eksperiencë te politikat monetare, Lagarde u zgjodh në muajin Korrik nga liderët e Bashkimit Europian për të zëvendësuar Mario Draghi nga data 1 Nëntor, në krye të institucionit financiar më të fuqishëm në Europë.
Lagarde, ish avokate dhe nënë e divorcuar e dy fëmijëve, u bë ministrja franceze e financave në vitin 2007, përpara se të merrte postin te Fondi Monetar Ndërkombëtar, kur paraardhësi Dominique Strauss-Khan u detyrua të japë dorëheqjen prej skandalit seksual.
Liderët e BE do të formalizojnë postin e saj në një samit rutinë në mes të Tetorit, për mandatin 8 vjeçar. Yves Mersch u votua gjithashtu nga parlamenti për t’u bërë zv/kryetari i njësisë së mbikqyrjes së BQE.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.